Parlament avtojol salasyn reformalaýǵa baǵyttalǵan zańdy qabyldady
ASTANA. 20 maýsym. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine avtojol salasyn reformalaý máseleleri boıynsha ózgerister men tolyqtyrýlar engizý týraly» zań jobasyn eki oqylymda qarap, qujatty qabyldady.
Parlament qabyldaǵan zań sapaly joldarmen qamtamasyz etýge, ony kútip ustaýǵa, bilikti mamandardy tarta otyryp, salany basqarýdy qaıta ońtaılandyrýǵa baǵyttalady. Reformalaý sheńberinde respýblıkalyq mańyzy bar avtokólik joldaryn kútip ustaýdy qazirgi kúni jol qyzmetin atqaryp otyrǵan «QazAvtojol» aktsıonerlik qoǵamy júzege asyryp, ol kompanııa aldaǵy ýaqytta da ulttyq operator retinde basqarýdy jalǵastyra beretin bolady. Soǵan oraı, qabyldanǵan zańnamada «QazAvtojol» men kólik mınıstrliginiń quzyrettik arajikteri ajyratylady.
Atap aıtqanda, saladaǵy memlekettik saıasatty iske asyrý, jalpy paıdalanýdaǵy avtomobıl joldaryn josparlaý, normatıvtik quqyqtyq aktiler men standarttardy engizý, jol qurylysynyń sapasyna baqylaýdy kúsheıtý sharalaryn Kólik jáne kommýnıkatsııa mınıstrligi júzege asyratyn bolady. Al ulttyq operator avtomobıl joldaryn salý, qaıta jańartý, jóndeý men ustaý jumystaryn uıymdastyryp, baqylaıdy. Aqyly avtomobıl joldaryndaǵy tólemder jınaýdy júzege asyrady.
Budan bólek, reformalaý sheńberinde 224 memlekettik qyzmetshi qysqarmaq. Ulttyq operatordyń jeke ınvestıtsııa tartý esebinen memlekettik jekemenshik áriptestikti damytý úshin jaǵdaılar jasalady. Ol jol jóndeý jumystarynyń kólemin ulǵaıtýǵa, servıstik qyzmet sapasyn arttyrýǵa múmkindik beredi.
Parlament qabyldaǵan zań Memleket basshysynyń qol qoıýyna joldanady.
