Parlament astananyń mártebesi týraly Konstıtýtsııalyq zańdy qabyldady
ASTANA. KAZINFORM — Búgin Parlament palatalarynyń birlesken otyrysynda «Qazaqstan Respýblıkasy astanasynyń mártebesi týraly» Konstıtýtsııalyq zań qabyldandy.
Qujat boıynsha baıandama jasaǵan Májilis depýtaty Nurtaı Sabılıanovtyń atap ótýinshe, «Qazaqstan Respýblıkasy astanasynyń mártebesi týraly» Konstıtýtsııalyq zań jobasy astananyń damýynyń quqyqtyq negizderin odan ári jetildirýge baǵyttalǵan. Ony qabyldaý qajettiligi astananyń elimizdiń qoǵamdyq-saıası, áleýmettik-ekonomıkalyq jáne halyqaralyq damýyndaǵy róliniń artýyna, sondaı-aq ýrbanızatsııa men halyqtyń kóshi-qon aǵynynyń qazirgi zamanǵy úrdisterine baılanysty.
— Búginde Astana memlekettik ınstıtýttar shoǵyrlanǵan ortalyq, iskerlik belsendilik, ekonomıkalyq áleýet jáne ınfraqurylymdyq damý ortalyǵy sanalady. Sondyqtan ony basqarý, aýmaqtyq damý jáne qalalyq ortany jetildirý máselelerine keshendi jáne júıeli tásil qajet. 15 mamyrda osy Konstıtýtsııalyq zań jobasy Parlament Palatalarynyń birlesken otyrysynda birinshi oqylymda maquldandy. Zań jobasyn ekinshi oqylymǵa daıyndaý barysynda Birlesken komıssııa Qazaqstan Respýblıkasy Parlamentiniń depýtattary men turaqty komıtetteriniń usynystaryn jan-jaqty talqylap, qarady, — dedi ol.
Depýtattyń aıtýynsha, birinshiden, zań jobasynyń jekelegen normalaryn Qazaqstan Respýblıkasynyń jańa Konstıtýtsııasynyń erejelerine sáıkes keltirýge baǵyttalǵan túzetýler engizildi. ekinshiden, Astananyń qala mańy aımaǵyna qosylǵan jerlerdi paıdalaný tártibi men rejımi boıynsha normalar naqtylandy. Osyndaı jerdi paıdalaný tártibi men rejımin Úkimet qala jáne oblys máslıhattary men ákimdikteriniń, sondaı-aq jergilikti aglomeratsııa keńesiniń birlesken usynysy negizinde aıqyndaıtyn bolady.
— Úshinshiden, astananyń jergilikti memlekettik basqarý organdarynyń mindetteri, astana máslıhaty men ákimdiginiń ókilettikteri boıynsha normalar naqtylandy. Máslıhattyń astanany damytýdyń ekonomıkalyq jáne áleýmettik baǵdarlamalaryn, astana bıýdjetin jáne olardyń oryndalýy týraly esepterdi bekitý jónindegi ókilettikteri bekitiledi. Sonymen qatar, astana ákimdiginiń jol júrisin uıymdastyrýdyń keshendi shemasyn ázirleý, sondaı-aq tranzıttik kólik júrisiniń shemasy men tártibin aıqyndaý jónindegi quzyretteri naqtylanady. Tórtinshiden, qala qurylysy saıasatyn iske asyrý jáne astananyń zamanaýı sáýlettik kelbetin qalyptastyrý maqsatynda Sáýlet-qala qurylysy keńesin qurý kózdelgen. Onyń quramyna astana ákimdiginiń ókilderi, sondaı-aq sáýletshiler engiziledi, — dedi ol.
Sonymen qatar depýtattyń sózine qaraǵanda, transparenttik pen obektıvtilikti qamtamasyz etý úshin depýtattar Keńestiń quramyna táýelsiz jáne kásibı sarapshylardy, sondaı-aq qoǵamdyq uıymdardyń ókilderin qosý jóninde túzetýler engizdi.
— Atap aıtqanda, qalalyq ortanyń qoljetimdiligin arttyrý maqsatynda, endi Sáýlettik-qala qurylysy keńesiniń quramyna múgedektigi bar adamdardyń múddelerin bildiretin sarapshylar engizilip otyr. Sondaı-aq, jekelegen normalardy naqtylaıtyn jáne Zań jobasynyń mazmunyn jaqsartatyn túzetýler usynyldy, — dedi Nurtaı Sabılıanov.
Osydan keıin qos palata depýtattary atalǵan zań jobasyn ekinshi oqylymda biraýyzdan qabyldady.
Aıta keteıik, jıynda depýtattar konstıtýtsııalyq zań jobalaryn ekinshi oqylymda qaraıdy.
