Parlament Astanada «elektrondyq úkimettiń» jahandyq forýmyn ótkizýge baǵyttalǵan kelisimdi qabyldady
Qujatta kózdelgen basty maqsat - 2014 jylǵy 6-8 qazanda Astanada «Birikken Ulttar Uıymynyń «elektrondyq úkimetiniń» 2014 jahandyq forýmyn» ótkizý bolyp tabylady. Al atalǵan forým aqparattyq-kommýnıkatsııalyq tehnologııalar salasynda mańyzdy is-sharalardyń biri. Forýmdy ótkizý qorytyndylary nátıjesinde Qazaqstannyń «elektrondyq úkimetti» damytý boıynsha tájirıbesin damyǵan elder arasynda da, damýshy elder arasynda da keńinen taratý josparlanǵan.
Kelisimge sáıkes, Qazaqstan Respýblıkasy oǵan 500 myń AQSh dollary mólsherinde qarajatyn engizetin bolady. Al BUU tarapynan jobanyń úılestirýshisin jaldaý, «Smart Government»-ke nazar aýdara otyryp, «elektrondyq úkimet» salasyndaǵy sarapshylardy aıqyndaý, forýmdy ótkizý, forým boıynsha jarııalanymdardy daıyndaý jumystary júzege asady.
«Kelisim aıasynda artyqshylyqtar men ımmýnıtetter, onyń ishinde BUU ókilderine - forýmǵa qatysýshylarǵa erkin kelý jáne ketý quqyǵyn berý qarastyrylǵan. Forým sheńberinde tórt sessııa ótkizý kózdeledi. Qazirgi ýaqytta forýmǵa QR Premer-Mınıstriniń, BUU Joǵary basshylyǵynyń, Halyqaralyq elektrobaılanys odaǵy bas hatshysy orynbasarynyń, sheteldik memlekettik organdardyń 10-nan astam basshylary qatysatyny qýattaldy. 40 memleketten 100-den astam sheteldik mamandar kelýge ótinish berip otyr», - dedi Investıtsııalar jáne damý vıtse-mınıstri Asqar Jumaǵalıev.
Tutastaı alǵanda, osy Kelisimdi iske asyrý elimizge «elektrondyq úkimet» pen memlekettik basqarý salasynda áleýetti arttyrýǵa, halyqaralyq keńistikte «elektrondyq úkimetti» damytýdaǵy óz tájirıbesin keńinen taratýǵa, múddeli taraptar arasynda yntymaqtastyqty jáne «aqylmen basqarý men aqyldy úkimetti» ilgeriletý jónindegi óńiraralyq tetikterdi damytýdy kúsheıtýge múmkindik beredi.
Parlament qabyldaǵan zań Memleket basshysynyń qol qoıýyna joldanady.
