Parlament arnaıy ekonomıkalyq aımaqtar týraly zańdy qabyldady
NUR-SULTAN. QazAqparat - Búgin QR Parlamenti Senatynyń jalpy otyrysynda palata depýtattary «Arnaıy ekonomıkalyq jáne ındýstrııalyq aımaqtar týraly» QR Zańyn qabyldady, dep habarlaıdy QazAqparat tilshisi.
Altynshy shaqyrylǵan QR Parlamentiniń úshinshi sessııasynyń ashylýynda Elbasy Nursultan Nazarbaev tikeleı ınvestıtsııalardy tartýǵa jáne eksporttyq óndiristi yntalandyrýǵa basty nazar aýdarylatynyn aıtqan bolatyn. Osyǵan baılanysty Úkimetke arnaıy ekonomıkalyq jáne ındýstrııalyq aımaqtar boıynsha zańnamany jaqsartý tapsyrylǵan edi.
Osy oraıda tıisti zań jobasyn senatorlarǵa QR Indýstrııa jáne ınfraqurylymdyq damý mınıstri Roman Sklıar tanystyrdy.
Atap aıtqanda, qujatta ındýstrııalyq aımaqtardyń qyzmetin quqyqtyq reglamentteý eskerilgen.
«Zańnamada ındýstrııalyq aımaqtar qurylǵannan qyzmet atqaryp, taratylǵanǵa deıingi barlyq tsıkl qarastyrylǵan. Arnaıy ekonomıkalyq jáne ındýstrııalyq aımaqtardyń qatysýshylaryna jer ýchaskelerin berýdiń jańa tetigi engizildi. Jer ýchaskeleri basqarýshy kompanııalarǵa ýaqytsha paıdalanýǵa beriledi. Al basqarýshy kompanııa ol ýchaskelerdi atalǵan aımaqtardyń qatysýshylaryna óz erkimen bere alatyn bolady. Bul tetik arnaıy ekonomıkalyq jáne ındýstrııalyq aımaq qatysýshylarynyń jer ýchaskelerin alý merzimin qysqartýǵa múmkindik beredi, sondaı-aq túrli ruqsat berý qujattaryn alýdy jeńildetedi», - dedi R. Sklıar.
Belgi bolǵandaı, arnaıy ekonomıkalyq jáne ındýstrııalyq aımaqtardyń basqarýshy kompanııalaryn qarjylandyrý qarastyrylady jáne jaýapkershiligi bekitiledi.
Osy oraıda qarjylandyrý tek basqarýshy kompanııanyń 100 paıyz aktsııalary memleketke tıesili bolǵan jaǵdaıda ǵana júzege asyrylady. Úkimettiń sheshimi boıynsha arnaıy ekonomıkalyq aımaqtardyń qyzmet etý merzimin uzartý múmkindigi qarastyryldy.
