Parlament alkogol ónimin satý ýaqyty men oryndaryn shekteıtin zańdy qabyldady
ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń keıbir zańnamalyq aktilerine etıl spırti men alkogol óniminiń óndirilýin jáne aınalymyn memlekettik retteý máseleleri boıynsha ózgerister men tolyqtyrýlar engizý týraly» zań jobasy eki oqylymda qaralyp, qabyldandy.
Qujattyń maqsaty - etıl spırti men alkogol óniminiń aınalymyna memlekettik baqylaýdy kúsheıtý bolyp tabylady. «2014-2016 jyldary kúshti alkogoldi ónimderge aktsızder 3,2 esege kóterilip otyr. Osyǵan oraı, úkimet kúshti alkogol ónimine eń tómengi bólshek baǵalaryn bekitti. Spırtti ishimdikterdi satý oryndary men ýaqyty, sondaı-aq saýda tártibi de shekteletin bolady», - deıdi QR Premer-Mınıstriniń orynbasary-Qarjy mınıstri Baqyt Sultanov. Onyń aıtýnysha, birinshiden zań jobasyna sáıkes, kúshti alkogol ónimderin satý ýaqyty on saǵatqa deıin, ıaǵnı meıramhanalardy, dámhanalar men barlardy qospaǵanda, keshki saǵat 21-den bastap, kelesi kúngi 12-ge deıin jumys jáne demalys kúnderine bólinbesten satýǵa tyıym salynady. Bul negizinen 30 gradýstan joǵary bolatyn spırtti ishimdikterge baılanysty bolyp tabylady. Al kúshtiligi budan tómen alkogolderge ýaqyttyq shekteýler burynǵysha túngi 23-ten tańǵy 8-ge deıin tyıym bolady.
Budan bólek, zańda spırtti ishimdikterdiń satylý oryndaryn shekteý máseleleri de kózdeledi. Toqtala ketetin jaıt, búgingi kúni bazarlarda, kóterme saýda bazarlarynda, dúńgirshekterde, sondaı-aq belgilenbegen oryndarda alkogol ónimderin satýǵa tyıym salynǵan. Al jańa zańnamamen buǵan densaýlyq saqtaý, bilim berý, balalar mekemeleriniń ǵımarattarynda, dene shynyqtyrý-saýyqtyrý, sport jáne sporttyq-tehnıkalyq qurylystarda tyıym salynatyn bolady. Sonymen qatar avtojanarmaı quıý stansalarynda tyıym salý belgilenedi.
Budan basqa, qujatta bıznes sýbektilerin kontrafaktilik jáne zańsyz alkogol ónimin satyp alýdan saqtandyrý maqsatynda alkogol ónimine arnalǵan eseptik-baqylaý tańbalarynyń tólnusqalyǵyn aıqyndaıtyn quraldardy engizý kózdeledi.
Tutastaı alǵanda, zańdy qabyldaý ázirleý elimizdiń ekonomıkalyq múddelerin, ekonomıkalyq qaýipsizdigin, azamattardyń ómiri men densaýlyǵyn qorǵaý qajettiginen týyndap otyr. Bul rette memleket etıl spırti men alkogol óniminiń óndirilýi jáne aınalymy protsesinde týyndaıtyn quqyqtyq qatynastar salasyndaǵy qatysýshylarǵa yqpal etýdiń tıimdi tetikterin ıelenýi tıis.
Parlament qabyldaǵan zań Memleket basshysynyń qol qoıýyna joldanady.
