Parlament áleýmettik qamsyzdandyrý máselelerin qamtyǵan qujatty qabyldady
ASTANA. 24 qańtar. QazAqparat - Búgin Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» zańyn eki oqylymda qabyldady. Parlament qabyldaǵan qujat memleket basshysynyń qol qoıýyna jiberiledi.
Atalǵan qujatty ázirleý zeınetaqymen qamsyzdandyrý týraly jáne mindetti áleýmettik saqtandyrý týraly qoldanystaǵy áleýmettik zańnamadaǵy olqylyqtardy joıý qajettigimen baılanysty bolyp tabylady. Budan bólek, qujat zeınetkerlik jastaǵy adamdardy, mindetti áleýmettik saqtandyrýǵa jatatyn adamdardy áleýmettik qorǵaýǵa, túptep kelgende olardyń ómir súrý sapasy men deńgeıin jaqsartýǵa baǵyttalǵan. Bul rette jobanyń maqsaty ornalasqan jeri belgisiz burynǵy qyzmetkerlerdiń mindetti zeınetaqy jarnalary boıynsha bereshekti óteýge baılanysty problemalardy sheshý, memlekettik áleýmettik saqtandyrý qorynyń qarjylyq turaqtylyǵyn qamtamasyz etý bolyp tabylady.
Eńbek jáne halyqty áleýmettik qorǵaý mınıstri Serik Ábdenovtiń aıtýynsha, zań jobasy boıynsha áıelder eń tómengi zeınetaqydan kem emes mólsherdegi tólemdi qamtamasyz etý úshin zeınetaqy jınaqtary jetkilikti bolǵan shaqta jáne 50 jasqa tolǵanda zeınetaqy annýıtetin satyp alý quqyǵyna ıelenedi. Eske salsaq, bundaı quqyq qoldanystaǵy zańnamada 55 jas retinde qarastyrylǵan bolatyn.
Sonymen qatar, qabyldanǵan zańǵa sáıkes, jınaqtaýshy zeınetaqy júıesine qatysýshylardyń quqyqtaryn keńeıtý qarastyrylady. Ol salýshylardyń zeınetaqy jınaqtaryndaǵy somasy jetkiliksiz bolǵan jaǵdaıda zeınetaqy annýıteti shartyn jasaý úshin ózderiniń erikti jáne erikti kásibı zeınetaqymen, sondaı-aq menshikti qarajatymen toltyrýdy kózdeıdi. Buǵan qosa jınaqtaýshy zeınetaqy júıesine qatysýshylardyń sanaty men quqyqtary da keńeıedi. Jınaqtary jetkilikti azamattarǵa birneshe saqtandyrý uıymyna zeınetaqy annýıtetin satyp alýǵa, sondaı-aq annýıtetti alý kezinde saqtandyrý syıaqysy somasyn 30 paıyz mólsherinde birjolǵy tólem alý quqyǵy beriledi.
«Sonymen qatar, mindetti áleýmettik saqtandyrý júıesine qatysýshylardyń quqyqtaryn keńeıtý kózdeledi. Osy maqsatta áleýmettik tólemderdi taǵaıyndaý kezinde tabysty tolyq esepteýdi qamtamasyz etý úshin qater týyndaǵan aıdyń esepke alynýǵa tıisti kezeńge qosylmaýy jáne áleýmettik aýdarymdardy esepteýdiń eń tómengi obektisi belgilenýi qamtylyp, eńbekke jaramsyz kúnder sanynyń koeffıtsentin engizý arqyly tólemder mólsheriniń áleýmettik aýdarymdarynyń kólemi men áleýmettik qater erejesine tikeleı baılanystylyǵyn qamtamasyz etý mindetteledi. Nátıjesinde memlekettik saqtandyrý qorynan áleýmettik tólemderdi taǵaıyndaý kezinde áleýmettik ádilettilik saqtaý rastalady», - deıdi mınıstr.
Budan bólek, zań jobasynda «Baıqońyr» kesheninde jumys istep júrgen azamattardy zeınetaqymen qamtamasyz etý quqyqtary da qarastyrylady.
