Parlament aldaǵy ýaqytta da Memleket basshysynyń bastamalaryn qamtamasyz etetin zań jobalaryn qaraýǵa daıyn- N. Nyǵmatýlın

Búgin QR Parlamenti palatalarynyń birlesken otyrysy barysynda baıandama jasaǵan Májilis Tóraǵasy Nurlan Nyǵmatýlın osylaı málim etti. Eske sala keteıik, birlesken otyrysta besinshi saılanǵan Parlamenttiń ekinshi sessııasy resmı túrde jabyldy.

Parlament aldynda baıandama jasaǵan Májilis spıkeri ekinshi sessııa barysynda kóterilgen mańyzdy máselelerge toqtala kele, zeınetaqy júıesin jańǵyrtýǵa baǵyttalǵan zań jobasyna erekshe nazar aýdardy. «Zeınetkerlik jasty birdeılendirý Parlament qabyrǵasynda ǵana emes, qoǵamnyń barlyq jiginde keńinen talqylandy. Bul sózsiz qajetti shara bolatyn. Zeınetaqy júıesin jańǵyrtý máselesi álemdik tájirıbe alǵa tartqan ǵana emes, búgingi zamannyń shynaıy talabyna aınalǵan kúrdeli dúnıe edi», dedi spıker. Sonymen qatar, Májilis Tóraǵasy Úkimet usynǵan zań jobasynyń bastapqy nusqasynda zeınetaqy jasyn birdeılendirý bóligine qatysty reformany 2014 jyldyń qańtarynan bastaý qarastyrylǵanyn aıtyp, alaıda el Prezıdenti zańnyń dál osy tusyna ózgerister engizgenin atap ótti.

«Biz bárimiz Elbasy eń qıyn sátterde óz eliniń taǵdyryn qolyna alatynyn, sóıtip, kúrdeli bolsa da jalǵyz tıimdi joldy, naǵyz durys joldy tabatynyn bilemiz. Qazaqstan zeınetaqy júıesin jańǵyrtý qajettiligimen betpe bet kelgende de N. Nazarbaev taǵy da óz halqynyń qamqorshysyna aınalyp, kóregendik pen danalyq tanytty. Máseleniń kúrdeliligin, sonymen bir mezgilde sheshim qabyldaýdyń mańyzdylyǵyna nazar aýdarǵan Memleket basshysy eń aldymen búgingi ǵana emes, Qazaqstannyń keleshek urpaǵynyń ahýalyn qaperge aldy. Qarapaıym azamattardyń múddesi úshin zeınet jasyn 2018 jyldyń 1 qańtarynan bastaýdy usyndy», dedi N. Nyǵmatýlın.

«Aldaǵy sessııa barysynda da Parlament osyndaı Prezıdenttiń mańyzdy bastamalaryn júzege asyrýdy qamtamasyz etetin zań jobalaryn qaraýǵa daıyn», dedi Májilis spıkeri.