Parlament Alataý qalasynyń arnaýly quqyqtyq rejımi týraly Konstıtýtsııalyq zańdy qabyldady

— Ekinshi oqylymǵa daıyndaý barysynda Birlesken komıssııa Parlament depýtattary men turaqty komıtetterdiń usynystaryn qarap, jan-jaqty talqylady. Depýtattardyń túzetýleri boıynsha zań jobasynyń normalary jańa Konstıtýtsııa erejelerine sáıkes keltirildi. Qujattyń ataýy endi «Alataý qalasynyń arnaýly quqyqtyq rejımi týraly» QR Konstıtýtsııalyq Zańy bolyp ózgertildi, — dedi Májilis depýtaty Nurtaı Sabılıanov.

Onyń aıtýynsha, Alataý qalasynyń damý perspektıvasyn eskere otyryp, arnaýly quqyqtyq rejımniń jekelegen erejelerin qala mańyndaǵy aımaqta da qoldaný múmkindigi naqtylandy. Munymen qosa, kásipkerlik qyzmetti júzege asyrý sharttary men ınvestıtsııalyq yntalandyrý sharalaryn aıqyndaıtyn «Alataý qalasynyń basym salalary», «bıznes-lıtsenzııa», «retteýshi ruqsat» jáne «salyq preferentsııasy» sııaqty jańa uǵymdar engizildi. Bul rette bıznes-lıtsenzııa rezıdentterge Alataý qalasynyń aýmaǵynda qyzmetin júzege asyrý quqyǵyn bere otyryp, osyndaı qyzmetti júzege asyrýdyń túrleri men sharttaryn aıqyndaıdy. Investıtsııalyq jobalar boıynsha salyq rejıminiń turaqty bolýy úshin «qarjylyq ornyqtylyq» jáne ashyqtyq qaǵıdattary kúsheıtildi.

— Tsıfrlyq bastapqylyq qaǵıdatyn jetildirý maqsatynda depýtattardyń túzetýlerimen qala sharýashylyǵy salalarynyń, ıaǵnı abattandyrýdyń, ınjenerlik, kóliktik jáne turǵyn úı-kommýnaldyq ınfraqurylymnyń, sondaı-aq qoǵamdyq qaýipsizdik júıeleriniń barlyq derekteri biryńǵaı tsıfrlyq platformada bolady dep bekitildi, — dedi depýtat.

Alataýda ınvestorlar quqyqtarynyń qorǵalýy kúsheıtildi

Konstıtýtsııalyq zań aıasynda kásipkerler men ınvestorlar quqyqtarynyń qorǵalýyn kúsheıtýge erekshe nazar aýdaryldy. Bıznes sýbektilerine qatysty tekserý júrgizýdi tek qana Bas prokýratýra organdarynyń júrgize alatyny týraly norma engizildi. Bul iskerlik ortanyń turaqty ári boljamdy bolýyna qosymsha kepildik beredi.

— Qazaqstan Respýblıkasynyń negizgi aýmaǵynda, onyń ishinde óndiristik-ótkizý tizbekteriniń jekelegen elementterin qalaǵa kóshirý esebinen bıznesti qoldaý úshin salyq preferentsııalaryn paıdalaný múmkindigin bolǵyzbaıtyn túzetýler egjeı-tegjeıli pysyqtalyp, bekitildi. Bul rette biz ekonomıkalyq aımaqtar jumys isteıtin úzdik halyqaralyq tájirıbelerdi (sonyń ishinde Shenchjen sııaqty Qytaıdyń arnaıy ekonomıkalyq aımaqtarynyń tájirıbesine) negizge aldyq, — dedi N. Sabılıanov.

Budan bólek, depýtattar bıýdjet qarajatynyń paıdalanylýyn baqylaýdy kúsheıtýge qatysty túzetýler engizdi. Endi Úkimet pen Joǵary aýdıtorlyq palatanyń Qazaqstan Respýblıkasynyń Quryltaıyna usynylatyn jyl saıynǵy esepteriniń quramyna Alataý qalasy ákimshiliginiń respýblıkalyq bıýdjet qarajaty boıynsha bıýdjettiń atqarylýy týraly esebi engiziletin bolady. Sondaı-aq, ákimshiliktiń bıýdjettiń atqarylýy týraly esebi men Alataý qalasyn damytý týraly jyldyq esepti ınternet-resýrstarda jarııalap otyrýdyń mindetti bolýy qarastyryldy.

Sonymen qatar, ákimshiliktiń jáne ákimshilikti basqarýdyń joǵarǵy alqaly organy retindegi Keńestiń quqyqtyq jaǵdaıy naqtylandy. Alataýdyń arnaýly quqyqtyq rejıminiń negizgi máseleleri boıynsha sheshimderdi Keńestiń qabyldaıtyny týraly qaǵıdat ta usynyldy.

— Depýtattardyń túzetýlerinde Ákimshiliktiń laýazymdy adamdarynyń (bas atqarýshy dırektor men ákimshilik qyzmetshileriniń), sondaı-aq Alataý qalasynyń ákimi men onyń orynbasarlarynyń ókilettikterin júzege asyrý kezindegi jaýapkershiligin engizý kózdeldi. Sonymen qatar, «Inklıýzıvti Parlament» depýtattyq tobynyń basshysy — depýtat Erlan Tursynbaıuly Ábdıev halyqtyń júrip-turýy shektelgen toptarynyń qala ishinde erkin qozǵalysyna qolaıly jaǵdaı jasaýǵa qatysty túzetýler engizdi. Sondaı-aq, ol sáýlet jáne qala qurylysy qyzmetin retteý kezinde ınklıýzıvti ári jaıly orta qalyptastyrý úshin ýnıversaldy dızaındy qoldanýdy da usynady. Zań jobasyn jetildirýge qatysty basqa da usynystar qarastyryldy, — dedi depýtat.

Budan buryn habarlanǵandaı, 20 naýryzda Parlament Alataý qalasynyń arnaýly mártebesi týraly qujatty birinshi oqylymda maquldady.

Aıta keteıik, Alataý qalasyndaǵy negizgi strategııalyq sheshimderdi Premer‑Mınıstr basqaratyn Keńes aıqyndaıdy. Investorlardyń quqyqtary halyqaralyq deńgeıde qorǵalady. Al salyq jeńildikteri tek basym salalardaǵy jańa ınvestıtsııalyq jobalarǵa beriledi.