Parlament aqsha belgilerin qoldan jasaýmen kúres jónindegi konventsııany qabyldady
ASTANA. Qazannyń 21-i. QazAqparat /Aıdar Ospanalıev/ - Búgin QR Parlamenti Senatynyń lpy otyrysynda «Aqsha belgilerin qoldan jasaýǵa qarsy kúres jónindegi halyqaralyq konventsııany jáne oǵan Hattamany ratıfıkatsııalaý týraly» zań qabyldandy.
Otyrysta atalmysh qujat boıynsha baıandama jasaǵan Ekonomıkalyq qylmysqa jáne sybaılas jemqorlyqqa qarsy kúres agenttigi tóraǵasynyń orynbasary Andreı Lýkınniń aıtýynsha, ekonomıkalyq qylmyspen, sonyń ishinde aqsha belgilerin qoldan jasaý áreketterimen kúres memlekettiń aldynda turǵan mańyzdy mindetterdiń biri. Sebebi atalmysh úderis eldiń áleýmettik-ekonomıkalyq damýyn tejep, naryqtyq ekonomıkanyń qurylysyna zardabyn tıgizip, ınvestıtsııa aǵymyna tejeý bolady. Osyǵan qaraı qazir ekonomıkalyq qylmystarmen kúres jańasha tásilderdi qoldanýdy qajet etip otyr.
«Bul rette árıne halyqaralyq deńgeıde birlesken qımyldardyń mańyzy zor. 1929 jyldyń sáýir aıynyń 20-ynda Jenevada aqsha belgilerin qoldan jasaý áreketterimen kúres jónindegi konventsııaǵa qol qoıylyp, oǵan 58 memleket qosyldy. Qujat aqsha belgilerin qoldan jasap, ony saýdalaýshylardy ustap berýge nemese olar jóninde qandaı da bir málimetterdi taýyp berip, qylmyskerlerdiń
jáne olardyń sybaılastarynyń qolǵa túsýine kómek kórsetýdi qarastyrady. Osyǵan qaraı Qazaqstannyń da atalmysh konventsııaǵa qosylýy quqyq qorǵaý organdaryna qylmys jasap, shet elde boı tasalap júrgen qylmyskerlerdi qolǵa túsirýge keń múmkindikter ashady. Sóıtip elimiz aqsha belgilerin qoldan jasaýmen kúres jónindegi halyqaralyq deńgeıdegi júıege qosylady. Óz kezeginde bul elimizdiń álem aldyndaǵy bedeli men bet-beınesine ıgi yqpalyn tıgizedi», dedi agenttik tóraǵasynyń orynbasary.
Qujatty senatorlar biraýyzdan qoldap ony qabyldaý qajet dep sheshti.
