Parlament AQSh-ta sottalǵan Qazaqstan azamattaryn qaıtarýǵa múmkindik beretin konventsııany qabyldady
Qylmystyq jazany óteý týraly amerıkaaralyq konventsııa 1993 jyldyń 9 maýsymynda Managýada qabyldanǵan. Konventsııaǵa 19 memleket múshe bolyp tabylady, sonyń ishinde buǵan Amerıka qurylyǵynyń Brazılııa, Kanada, Meksıka, AQSh sekildi 16 eli qosylǵan, al qalǵan úsheýi Saýd Arabııasy, Chehııa men Úndistan sekildi Amerıka qurlyǵyna jatpaıtyn memleketter. Solardyń arasyna konventsııaǵa qosylatyn tuńǵysh Ortalyq Azııa memleketi retinde Qazaqstan da engeli otyr. Osylaısha, Qazaqstan bir konventsııany qabyldaý arqyly bir mezgilde 19 elmen qarym-qatynas ornata alady degen sóz.
Konventsııaǵa sáıkes, bir qatysýshy memlekette ekinshi qatysýshy memlekettiń azamatyna qatysty shyǵarylǵan úkimdi sottalǵan adam ózi azamaty bolyp tabylatyn memlekette óteı alatyn múmkindikter qarastyrylady. Bul rette sottalǵan adamdy bir memleketten ekinshi memleketke berý úkim shyǵarǵan memlekettiń suraý salýy, qabyldaýshy memlekettiń suraý salýy nemese sottalǵan azamattyń óziniń suraý salýy negizinde júrgiziledi. Ol úshin sottalǵandardy berý týraly suraý salýdy ortalyq organdar qaraýǵa tıis nemese ondaı organdar bolmaǵan kezde konsýldyq, dıplomatııalyq arnalar arqyly qaralýǵa tıis.
«Zańǵa sáıkes, biz Amerıka elderinde sottalǵan azamattarymyzdy qaıtaryp, qalǵan jazany elimizde óteýge múmkindik bere alamyz. Biraq, bul úshin birqatar talap bar. Birinshiden, sottalǵannyń ózi nemese onyń zańdy ókili sony qalaýy qajet, onyń erki bolmasa májbúrlep ákelinbeıdi. Ekinshiden, ol tulǵa qabyldaýshy memlekettiń azamaty bolýy tıis. Úshinshi - eki jaqtyń Qazaqstannyń da, Amerıka elderiniń de tıisti organdarynyń kelisimi kerek. Munymen qatar, sottalǵannyń is-áreketi eki elde de qylmys bolyp tanylýy tıis. Budan bólek, ólim jazasy bolmaýy qajet jáne qalǵan jazanyń merzimi keminde alty aı bolýy shart», - dedi QR Bas prokýror orynbasary Iogan Merkel.
Onyń aıtýynsha, búgingi kúni osy konventsııa AQSh-ta sottalǵan qazaqstandyqtar Tájaıaqov pen Qadyrbaevty qaıtarýǵa múmkindik beretin quqyqtyq qural bolyp tabylady.
Parlament qabyldaǵan zań Memleket basshysynyń qol qoıýyna joldanady.
