Parlament agroónerkásip keshenin damytýǵa baǵyttalǵan zańdy qabyldady
ASTANA. 26 jeltoqsan. QazAqparat - Búgin QR Parlamenti Senatynyń Tóraǵasy Qasym-Jomart Toqaevtyń jetekshiligimen ótken palatanyń jalpy otyrysynda «Qazaqstan Respýblıkasynyń keıbir zańnamalyq aktilerine agroónerkásiptik keshen máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda qabyldandy.
Atalǵan qujat boıynsha 12 zańnamalyq aktige agroónerkásip kesheni men veterınarııa salasyn jetildirýge baǵyttalǵan ózgerister engizý kózdeledi. Sonymen qatar, qujatty ázirleýge Elbasynyń Joldaýyndaǵy tapsyrmalaryn oryndaý negiz bolǵan. Atap aıtqanda, Memleket basshysy «jeke ınvestıtsııalardyń agrarlyq óndiriske táýekelin tómendetý úshin zaemdardy kepildendirý men saqtandyrýdyń memlekettik júıesin engizý» týraly tapsyrma júktegen bolatyn.
Zańda ınvestıtsııalyq salymdar kezinde agroónerkásip keshen sýbektileri shyǵystarynyń bir bóligin óteý qarastyrylady. Osy arqyly olar jańa óndiris qýatyn qurǵan kezde nemese qoldanystaǵysyn jańǵyrtý barysynda ózderiniń shyǵystaryn ishinara jaba alady. Memlekettik qoldaýdyń osy baǵyty agrarlyq sektorǵa ınvestıtsııany arttyrýǵa, agroónerkásip kesheniniń basym baǵyttaryn damytýǵa oń yqpal etedi.
Budan bólek, qujat boıynsha qaıta óńdeýshi kásiporyndardyń aýyl sharýashylyǵy shıkizatyn satyp alýǵa arnalǵan shyǵyndaryn sýbsıdııalaý qarastyrylyp otyr. Sonymen birge, memlekettik satyp alynatyn shıkizattyń keıbir túrlerin ǵana sýbsıdııalaý kózdeledi. Atap aıtqanda, qant qyzylshasy men sútti satyp alýǵa basymdyq berilmek. Óıtkeni, mundaı shıkizat túrleri elimizdiń azyq-túlik qaýipsizdigin qamtamasyz etýde mańyzdy sanalyp otyr. Budan bólek, zań jobasymen veterınarlyq-sanıtarlyq qaǵıdalardy buzǵany úshin ákimshilik jaýaptylyqty qataıtý usynylady. Sonymen birge, aýyl turǵyndaryn qoldaýdyń jańa sharalary da qarastyrylady.
Jalpy Parlament qabyldaǵan zań Qazaqstannyń agroónerkásiptik keshendi damytý jónindegi 2013-2020 jyldarǵa arnalǵan «Agrobıznes-2020» baǵdarlamasynda kózdelgen memlekettik qoldaýdyń birqatar múldem jańa quraldaryn engizýge quqyqtyq negiz jasaıdy delinedi. Depýtattardyń aıtýynsha, qujat Qazaqstannyń DSU-ǵa kirý jaǵdaıynda ekonomıkanyń aýyl sharýashylyǵy kesheniniń básekege qabilettiligin arttyrýǵa múmkindik beredi. Munyń ózi túptep kelgende elimizdiń azyq-túlik qaýipsizdiginiń jaı-kúıine jáne tutastaı alǵanda agrarlyq saladaǵy óndiristiń tıimdiligine oń áserin tıgizetin bolady.
