Parlament 2011 jyly 152 zań qabyldady

Búgin QR Parlamenti Senatynyń jalpy otyrysynda aǵymdaǵy jyldyń sońǵy otyrysyn qorytyndylap, sóz sóılegen palata spıkeri Qaırat Mámı osylaı málimdedi.

«Búgin palatanyń aǵymdaǵy jylǵy sońǵy otyrysy bolyp ótti. Jalpy aǵymdaǵy jyly biz 36 plenarlyq otyrys ótkizip, 152 zań qabyldadyq. Olardyń ishinde quqyqtyq tártipti kúsheıtip, ekonomıkany damytýǵa baǵyttalǵan qujattar da bar», - dedi Qaırat Mámı. Budan bólek, palata Tóraǵasy el Parlamentiniń qoǵamdaǵy mańyzdy róline toqtala kele, onyń mártebesin de arttyra túsý qajettigin atap ótti.

Jalpy alǵanda Senat spıkeriniń aıtýynsha, palata depýtattary jyl basynan beri Úkimet basshysy men basqa da memlekettik organdardyń basshylarynyń atyna 206 depýtattyq saýaldar joldaǵan. Olardyń basym bóligi ekonomıka salasyna, turǵyn úı qatynastaryna, áleýmettik-mádenı damýǵa, bilim salasyna jáne quqyqtyq salalarǵa qatysty bolyp otyr. «Árıne, saýaldarda kóterilgen ózekti máselelerdiń barlyǵy 100 paıyz oryndaldy dep aıtýǵa kelmes. Alaıda olardyń basym bóligi memlekettik organdardyń naqty is-áreketteri túrinde oryndalyp ta jatyr», - dedi Qaırat Mámı.