Parkıngti «bombadan qorǵaıtyn oryn» retinde paıdalaný normamen bekitildi

ASTANA. KAZINFORM – Elimizde soǵys jaǵdaıynda jertóle, qosalqy úı-jaı jáne jerasty parkıngterin «bombadan qorǵaıtyn oryn» retinde paıdalaný normasy bekitildi. Bul týraly Kazinform-nyń resmı saýalyna TJM joldaǵan jaýapta aıtylǵan.

— TJM bastamasy boıynsha Ónerkásip jáne qurylys mınıstrligimen birlesip qurylys normalaryna ǵımarattardyń elementterin (jertóleler, qosalqy úı-jaılar jáne jerasty parkıngteri túrindegi jerasty keńistigi) qarapaıym pana retinde paıdalaný múmkindiginiń talaptaryn engizý máselesi pysyqtaldy. Ónerkásip jáne qurylys mınıstrliginiń (2024j.22.10. №134-NQ) buıryǵymen 2.04-15-2024 «Qarapaıym pana» QR Qurylys normalary bekitildi. Normatıv halyqty soǵys jaǵdaıy kezeńinde nemese soǵys ýaqytynda ádettegi zaqymdaý quraldarynyń baǵyttalmaǵan zaqymdaýshy faktorlarynan qorǵaýǵa arnalǵan qarapaıym jasyryn pana qyzmetin atqaratyn úı-jaılarǵa qoıylatyn mindetti talaptardy qalyptastyrady. Osy normalardyń talaptary adamdar kóp jınalatyn obektilerdiń 16 túrin qamtıdy, - delingen habarlamada.

Vedomstvo málimetin saı, halyq úshin qarapaıym panalardy paıdalaný «Azamattyq qorǵanys obektilerin qurý jáne paıdalaný qaǵıdalaryn bekitý týraly» Úkimet qaýlysymen aıqyndalǵan (2014j. 19.12. №1357). 

Aıta keteıik, buǵan deıin elimizdegi bombadan qorǵaý oryndarynyń 70 paıyzy jekeniń qolynda ekenin jazǵan edik. 

Sondaı-aq soǵys jaǵdaıynda azamattardy qorǵaıtyn mobıldi modýlderdiń ulttyq standarty ázirlengenin habarlaǵanbyz.