Parkıngti kólik jýatyn orynǵa aınaldyryp jatyr — depýtat turaq máselesin kóterdi

ASTANA. KAZINFORM — Májilis depýtaty Jıgýlı Daırabaev iri qalalarda parkıngtiń maqsatyn ózgertip, kólik jýý nemese tehnıkalyq qyzmet kórsetý stansasyna aınaldyryp jatqanyn aıtty.

— Turǵyn úı qatynastary týraly zań jobasynda parkıngtiń konstrýktsııalyq bóligin nemese fýnktsııanaldyq qyzmetin ózgertýge tyıym salynatyny aıtylǵan. Osy zańnyń 2-babynda kóppáterli turǵyn úılerdiń parkıngi arnaıy aıqyndalǵan avtokólikterdi qoıýǵa arnalǵan turaq. Qazir Astana jáne basqa megopolıs qalalarda kópqabatty turǵyn úılerdiń aınalasynda kólik qoıatyn oryndardyń jetkiliksizdigi burynǵydan da ózekti. Sonymen qatar parkıngter kólikterdi qoıýǵa ǵana arnalǵanyna qaramastan menshik ıeleri parkıngti tolyq qaıta jóndeýden ótkizip, jabdyqtap, avtoturaq tapshylyǵyn týǵyzýda. Osylaısha olar parkıngtiń maqsatyn ózgertip, kólik jýý nemese tehnıkalyq qyzmet kórsetý stansasyna aınaldyryp jatyr. Parkıngti aýystyrýǵa qatysty ustanymdaryńyz qandaı? , — degen saýal qoıdy Májilis depýtaty Jıgýlı Daırbaev jalpy otyrysta. 

Halyq qalaýlysynyń saýalyna Ónerkásip jáne qurylys vıtse-mınıstri Qýandyq Qajkenov jaýap berdi. 

— Jobalyq-smetalyq qujattama boıynsha saraptamadan ótken avtoturaqtar jobada qarastyrylǵan normatıvtik talaptarǵa sáıkes qoldanylýy tıis. Eger turǵyn úı kesheninde keminde 100 avtoturaq qarastyrylsa, ol zań aıasynda iske asyrylýy kerek. Qaıta jabdyqtaýǵa jáne ózgertýge jol berilmeıdi. Elektr qýaty stansasyna keletin bolsaq, onyń talaptary qoldanystaǵy zańnamada burynnan qarastyrylǵan. Elektr qýaty stansasyn qamtamasyz etý úshin qajetti tehnıkalyq sharttar bolýy tıis. Sondaı-aq atalǵan talaptar memlekettik organdardyń tehnıkalyq reglamentinde qarastyrylǵan, — deıdi mınıstrdiń orynbasary.

Aıta ketsek, elimizde soǵys jaǵdaıynda jertóle, qosalqy úı-jaı jáne jerasty parkıngterin «bombadan qorǵaıtyn oryn» retinde paıdalaný normasy bekitildi.