Park ıeleri qoǵamdyq kólik qyzmetin jaqsartýǵa nıet tanytpaı otyr – CTS
NUR-SULTAN. QazAqparat – «City Transportation Systems» (CTS) JShS-niń basqarma tóraǵasy Bekmyrza Igenberdınov elordanyń jol-kólik jáne qoǵamdyq kólik qozǵalysyndaǵy birneshe problemany atady, dep habarlaıdy QazAqparat tilshisi.
«Búginde qalada ózen arqyly ótetin magıstraldyq kósheler men qosylystardyń sany jetkiliksiz. Balama joldyń bolmaý saldary kólik keptelisine alyp keledi. Ásirese qarbalas ýaqytynda. Sonymen qatar sheshimin tappaı kele jatqan taǵy bir problema - avtobýstarǵa arnalǵan burylý alańdary men avtobýs júrgizýshilerin daıarlaýǵa arnalǵan polıgon joq. Sol sııaqty, qalada velosıpedke arnalǵan jol azshylyqty quraıdy. Atalǵan máseleler qaladaǵy jol-kólik ınfraqurylymynyń damýyna keri áserin tıgizedi», - dedi Bermyrza Igenberdınov qalalyq máslıhattyń kezekten tys sessııasynda jasaǵan baıandamasynda.
Sondaı-aq, CTS basshysy avtobýs parkteriniń problemasyn kóterdi.
«Bıýdjetten sýbsıdııa ala otyryp, park ıeleri qajetti kólemde avtobýstaryn jańarta almaı otyr. Óıtkeni, tabys aǵymdyq operatsııalyq jáne paıdalaný shyǵyndaryn jabýǵa jumsalady. Sonymen birge, tasymaldaýshy kiristeriniń naqty kórinisi bar, biraq olardyń shyǵys bóligi týraly túsinik joq. Sondyqtan da avtobýs parki ıeleri qoǵamdyq kólik qyzmetin jaqsartyp, tıisti deńgeıde kóńil bólýge nıet tanytpaı otyr. Kólikti damytýdyń uzaq merzimdi strategııalyq josparynyń bolmaýy jolaýshylardy tasymaldaýshylardy qarjylandyrýdyń naqty josparyn ázirleýge kedergi keltirýde», - deıdi ol.
Onyń aıtýynsha, joǵaryda atalǵan máselelerdiń saldarynan negizgi kólik elementteri, jol ınfraqurylymy jáne qoǵamdyq kólik tıisti deńgeıde damymaı otyr.
Aıta keteıik, búgin Nur-Sultan qalalyq máslıhatynyń kezekten tys sessııasy ótti. Jıynda qalanyń ınfraqurylymdyq damýy, turǵyn úı, balalar jáne jol qaýipsizdigi, taǵy sol sııaqty máseleler qaraldy.
