«Parıj–Nıtstsa» jarysy: «Astana Team» veloshabandozy ekinshi kezeńde jeńiske jetti

Kanter pelotonnan jappaı sprıntte komandalyq úılesimdi jumystyń arqasynda top jardy. Qashyqtyqtyń sońǵy shaqyrymynda ony alǵa nıderlandtyq shabandoz Maık Tenıssen alyp shyqty. Nátıjesinde nemis sprınteri máre syzyǵyn birinshi bolyp kesip ótip, Red Bull — BORA — hansgrohe komandasynyń jańa zelandııalyq sportshysy Lorens Pıtı men Soudal Quick-Step komandasynyń belgııalyq shabandozy ıAsper Steıvennen ozyp ketti.

Bul Maks Kanterdiń Álemdik týr jarystaryndaǵy alǵashqy jeńisi bolsa, XDS Astana Team úshin 2026 jylǵy maýsymdaǵy osy deńgeıdegi alǵashqy jeńis boldy.

— Bul jeńis men úshin armannyń oryndalýymen teń. «Parıj–Nıtstsa» — óte bedeldi jarys, al munda kezeń utý — keremet jetistik. Sońǵy birneshe apta men úshin ońaı bolǵan joq, densaýlyǵymda qıyndyqtar boldy. Osynda kelgende ózimniń daıyndyǵyma tolyq senimdi bolmadym. Keshe birinshi kezeńde de jaǵdaı asa kóńil kónshitpedi. Biraq jyldamdyq saqtaldy, búgin bári oıdaǵydaı boldy, — dedi Kanter komanda baspasóz qyzmetine bergen pikirinde.

Sportshynyń aıtýynsha, ol kezeń boıy barynsha nazaryn saqtaýǵa tyrysqan. Alaıda sońǵy shaqyrymdar óte tartysty ótken, shamamen márege eki shaqyrym qalǵanda komanda birneshe pozıtsııadan aıyrylǵan.

— Biraq Maık Tenıssen sabyr saqtap, men oǵan senim arttym. Ol meni alǵa tamasha alyp shyqty, sońǵy kılometrdi keremet ótkizdi jáne 200 metr qalǵanda yńǵaıly orynǵa jetkizdi. Odan keıin men bar kúshimdi saldym, eshkim meni basyp oza almady. Bul jeńis maǵan úlken senim beredi. Osyndaı joǵary deńgeıde de jeńiske jetýge bolatynyn dáleldedi. Komandama alǵys aıtqym keledi, búgin jigitter bar kúshin saldy, — dedi Maks Kanter.

Aıta keteıik, jarystyń ekinshi kezeńi Épone — Montargis baǵyty boıynsha ótip, qashyqtyǵy 187 shaqyrymdy qurady. Alda sportshylardy taǵy alty kezeń kútip tur.

Buǵan deıin XDS Astana Team komandasynyń ıtalııalyq veloshabandozy Krıstıan Skaronı «Oman týry» kópkúndik jarysynyń jeńimpazy atanǵan bolatyn.