Parıjge jettik, búgin olımpıadalyq qalashyqta alǵashqy jattyǵýymyzdy bastaımyz – Myrzaǵalı Aıtjanov

ASTANA. KAZINFORM — Qazaq boksshylary Frantsııa astanasy Parıj qalasynda ornalasqan Olımpıada qalashyǵyna aman-esen jetip, alǵashqy daıyndyqtaryna kirisip ketti. Bul týraly kazinform tilshisine ulttyq quramanyń bas bapkeri Myrzaǵalı Aıtjanov aıtyp berdi.

«Parıjge aman-esen jettik. Bizdi áýejaıda Qazaqstannyń Frantsııadaǵy Elshiliginiń ókilderi qarsy aldy. Olımpıada qalashyǵynyń atmosferasy keremet kóńil kúı syılady. Qonaqúı de jaıly, taza, retti. Búginnen bastap, Parıjdegi alǵashqy jattyǵýymyzdy bastaımyz. 25 shilde kúni jerebe tartý rásimi. Jalpy, jarysqa daıynbyz», - dedi bas bapker.

Aıta keteıik, Parıj Olımpıadasyna bokstan erler quramasy tolyq quramda, ıaǵnı 7 salmaqta, al áıelder quramasy 3 salmaqta synǵa túsedi.

Erlerden Sáken Bıbosynov, Mahmud Sabyrhan, Muhammedsabyr Bazarbaıuly, Aslanbek Shymbergenov, aǵaıyndy Nurbek Oralbaı men Aıbek Oralbaı jáne Qamshybek Qońqabaev el namysyn qorǵasa, áıelderden Nazym Qyzaıbaı, Karına Ibragımova jáne Valentına Halzova sharshy alańǵa shyǵady.

Esterińizge sala keteıik, qazirgi tańda tórtjyldyq dodaǵa joldama jeńip alǵan qazaqstandyq sportshylarymyzdyń alǵashqy legi Parıjdegi olımpıadalyq qalashyqqa baryp úlgerdi.

Qazaqstan quramasy Olımpıada oıyndaryna sporttyń 25 túrinen 92 joldama jeńip aldy.

Frantsııa astanasy Parıj qalasynda ótetin XXXIII jazǵy Olımpıada oıyndary 26 shilde men 11 tamyz aralyǵynda ótedi.