Parıjge sportshylarymyzdy qoldaýǵa keldim — úsh dúrkin Qazaqstan barysy

ASTANA. KAZINFORM — Búgin qazaq kúresinen «Qazaqstan barysy» týrnıriniń úsh dúrkin chempıony Beıbit Ystybaev olımpıadashylarymyzǵa qoldaý bildirýge arnaıy Parıjge ushyp keldi.

Kósheden kezdeısoq kezdestirip qalǵan belgili balýanymyzdan shaǵyn suhbat alyp, Parıjge kelgendegi maqsatyn bólisip úlgerdik.

«Qurmetti sport janashyrlary, biz búgin Frantsııanyń astanasy Parıj qalasyna keldik. Kelýdegi maqsatymyz — Qazaqstan sportshylaryna jankúıer bolý. Elimizden kelgen búkil sportshylarymyzǵa sáttilik tileımin. Buıyrsa olımpıadashylarymyzdyń eldi, áke-sheshe, baýyrlaryn qýantýǵa Alla násip etsin. Bul — tórt jylda bir keletin tarıhı sátterdiń biri. Sportshylarymyz osynyń aldyndaǵy Tokıo olımpıadasyndaǵy sátsizdiktiń orynyn toltyrady dep senemin», -dedi Beıbit Ystybaev.

Aıta keteıik, ol 2012, 2015 jáne 2016 jyldary qazaq kúresinen úsh dúrkin Qazaqstan barysy atanǵan bolatyn.

Frantsııa astanasy Parıj qalasynda XXXIII jazǵy Olımpıada oıyndary 26 shilde men 11 tamyz aralyǵynda ótedi. 

Oǵan álemniń 205 elinen 10 500 sportshy qatysady.