Parıjge qazaq balýandaryna qoldaý kórsetýge keldim – Dáýlet Turlyhanov
PARIJ. KAZINFORM — Frantsııa astanasy Parıj qalasynda ótip jatqan Olımpıada oıyndarynda búgin qazaq balýandary synǵa túsedi.
Jarys bastalar aldynda qazaqtyń dańyqty balýany Dáýlet Turlyhanovti kezdestirip qaldyq. Ol Parıjge kúres túrlerinen synǵa túsetin qazaq jigitterin qoldaýǵa kelgenin atap ótti.
«Qazaq balýandaryn qoldaýǵa kelip otyrmyn. Mine, kúres túrlerinen balýandarymyz Parıj Olımpıadasyn bastaıdy. Búgin grek-rım kúresi men áıelder kúresinen alǵashqy beldesýler ótedi. Grek-rım kúresinen eki balýanymyz — 60 kelide Aıdos Sultanǵalı men 130 kelide Álimhan Syzdyqov synǵa túsedi. Ekeýine de jerebede myqty qarsylastar tústi. Ekeýide eń myqty degen balýandarmen kúresedi. Sáttilik tileımin. Jeńis – eńbek pen terdiń arqasynda keledi. Jigitterimiz jankúıerlerin qýantsyn. Alǵa Qazaqstan!» - dedi dańqty balýan Dáýlet Turlyhanov.
Parıj Olımpıadasynda búgin, ıaǵnı 5 tamyz kúni qazaqstandyq sportshylar stend atý, jeńil atletıka, grek-rım kúresi sekildi 3 jarys túrinen baq synaýda.
