Parıjdikter 100 jyldan keıin alǵash ret Senada shomyla bastady

ASTANA. Kazinform – Parıj turǵyndary 100 jyldan astam ýaqyttan keıin alǵash ret Sena ózeninde zańdy túrde shomylý múmkindigine ıe boldy. 5 shilde kúni ózende úsh arnaıy shomylý aımaǵynyń resmı ashylýy ótti, dep habarlaıdy Euronews.

Parıj meri Ann Idalgo senbi kúni tańerteń shomylý aımaqtarynyń biriniń ashylýyna qatysyp, balalyq armany oryndalǵanyn aıtty.

- Meniń bala kezimnen bergi armanym – adamdardyń Senada qaıtadan shomyla alýy edi, – dedi ol.

Shomylýǵa arnalǵan úsh aımaq Eıfel munarasynyń, Qudaı Ana soborynyń jáne Fransýa Mıtteran atyndaǵy kitaphananyń janynda ornalasqan. Osy arnaıy aımaqtardan tys jerde shomylýǵa qaýipsizdik maqsatynda áli de tyıym salynǵan.

Aıta keteıik, Senada shomylýǵa 1923 jyldan bastap ózenniń lastanýy men belsendi keme qozǵalysyna baılanysty tyıym salynǵan bolatyn. Alaıda ótken jyly Parıj bıligi men Olımpıada oıyndarynyń uıymdastyrý komıteti ózendi tazartý úshin 1,4 mlrd eýroǵa jýyq qarjy quıyp, qazir Senadaǵy sý sapasy kóp jaǵdaıda Eýropalyq odaqtyń standarttaryna saı keletini habarlandy.

Ekologtardyń málimetinshe, sýdyń bakterııalar deńgeıi resmı shekti kórsetkishterden áldeqaıda tómen.

- Sýdyń sapasy keremet, – dedi Il-de-Frans aımaǵynyń prefektisi Mark Gııom. – Biz ishek taıaqshasy men enterokokk deńgeıin baqylaımyz: bireýiniń mólsheri shekti deńgeıden on ese, ekinshisiniki 25 ese tómen.

Alaıda jergilikti turǵyndardyń barlyǵy bul jańalyqty qýana qabyldap otyrǵan joq.

- Shynymdy aıtsam, táýekelge barmaımyn, – dedi jergilikti turǵyndardyń biri AP agenttigine. – Senada neshe túrli zattardyń júzip júrgenin óz kózimmen kórdim, sondyqtan shynymen taza ekenine kózim jetkenshe kúte turamyn.

Aıta keteıik, Frantsııada aptap ystyqtan eki adam qaza tapty.