Parıjdi tuńǵysh ret áıel adam basqarmaq
ASTANA. QazAqparat - Frantsııada mýnıtsıpaldy saılaý ótýde. Bul saıası tartys el prezıdenti Fransýa Ollandtyń sotsıalıstik úkimeti úshin mańyzdy synaq bolmaq, dep habarlady Bı-Bı-Sı.
Saılaýshylar eldegi barlyq mýnıtsıpalıtet músheleri men merleriniń esimderine tańdaý jasaý tıis. Onyń ishinde eldiń astanasy Parıj qalasy da bar. Aıta keterligi, el astanasynyń bul jolǵy ákimi názik jandy bolatyndyǵy anyq. Olar tipti ekeý de. Onyń biri - Frantsııanyń burynǵy energetıka jáne ekologııa mınıstri Natalı Kostıýshko-Morıze. Bul hanym kezinde eldiń memleket basshysy Nıkolıa Sarkozıdiń saılaýaldy naýqanynda resmı ókil de bolǵan edi. Al onyń basty qarsylasy - Parıjdiń qazirgi meri Bertran Delanoenyń orynbasary Anna Idalgo. Aldyn ala áleýmettik saýaldarǵa qaraǵanda, eki kandıdattyń da qala basshysy bolý múmkindikteri teń.
