Parıjden keıingi alǵashqy doda: Qazaq boksshylary Shymkenttegi halyqaralyq týrnırde baq synaıdy
ASTANA. KAZINFORM – Parıj Olımpıadasynan keıin biraz úzilis alǵan qazaq boksshylary sharshy alańǵa qaıta oralmaq. Ulttyq quramanyń úzdikteri Shymkentte ótetin Qaraqozy Ábdálıevti eske alýǵa arnalǵan halyqaralyq týrnırde baq synaıdy.
QR Boks federatsııasy málim etkendeı, osymen 43-ret ótkizilgeli otyrǵan básekege bıyl bas komandanyń kóshbasshylarynan bólek, sheteldik bylǵary qolǵap sheberleri baq synamaq. Keńes Odaǵynyń batyry Qaraqozy Ábdalıevti eske alýǵa arnalǵan týrnır dástúrli túrde ótkizilip keledi.
Shymkent tórin dúbirge bóleıtin synda ulttyq quramadarn bólek, Qyrǵyzstan, Ózbekstan, Tájikstan, Ýkraına quramalarynan sportshylar keledi. Túrkııa jáne Egıpet quramalarymen de kelissiózder júrip jatqany belgili boldy.
Qaraqozy Ábdálıevti eske alýǵa arnalǵan týrnırge Qazaqstannan tórt qurama qatysady. Alaıda, Ulttyq quramanyń birinshi nómirli boksshylary arasynan Aslanbek Shymbergenov, Qamshybek Qońqabaev (+92 keli) jáne Nurbek Oralbaı (80 keli) bul týrnırge qatyspaıtyny aıtylǵan.
Qaraqozy Ábdálıevti eske alýǵa arnalǵan týrnır 29 qyrkúıek pen 5 qazan aralyǵynda Shymkent qalasynda ótedi. Aıta ketelik, buǵan deıin bas bapker Qaırat Sátjanov Shymkenttegi týrnırdiń mańyzy týraly aıtqan bolatyn.
«Olımpıada oıyndary aıaqtalǵan soń, bokstan eresekter komandasy qandaı da bir jarysqa qatysqan joq. Aldaǵy ýaqytta Qaraqozy Ábdálıevti eske alýǵa arnalǵan iri halyqaralyq báseke ótedi. Bul dodada ulttyq qurama sportshylarynyń barlyǵy da baq synap kóredi. Týrnırge deıin Túrkistan oblysyndaǵy «Alma taý» bazasynda Ýkraına quramasymen birlesken jattyǵý jıynyn ótkizemiz. Bir aıta keterligi, halyqaralyq týrnırge Túrkııa, Ózbekstan, Tájikstan syndy memleketterden sportshylar keledi. Osy týrnır ulttyq qurama boksshylary úshin aldaǵy Azııa birinshiligine irikteý bolatynyn eske salamyn», - dedi Sátjanov.
Esterińizge sala keteıik, keshe boks federatsııasy jańadan jasaqtalǵan bapkerler quramyn jarııalady.
