Parıjdegi Grand Slam týrnırinde eki qazaqstandyq dzıýdoshy qola júldege ıe boldy
ASTANA. KAZINFORM – Frantsııa astanasy Parıjde ótip jatqan álemdik Grand Slam jarysynda Qazaqstan qorjynyna búgin eki qola júlde tústi.
Jarystyń ekinshi kúninde Abylaıhan Jubanazar (81 keli) jáne Nurlyhan Sharhan (100 keli) úzdik úshtikten kórindi.
Qola medal úshin beldesýde Abylaıhan Aýstrııa sportshysy Bernd Faschındi jarystan shyǵardy.
Aıta ketsek, bul – otandasymyzdyń álemdik Grand Slam jarysyndaǵy jetinshi júldesi. Buǵan deıin ol 1 kúmis, 5 qola júldege qol jetkizgen edi.
Abylaıhan Jubanazar 2000 jyly 15 aqpanda Qyzylorda oblysy Qazaly qalasynda dúnıege kelgen. Sport jolyndaǵy alǵashqy qadamyn 2013 jyly qazaq kúresinen bastaǵan. Qazir dzıýdo kúresinen halyqaralyq dárejedegi sport sheberi ataǵyn alǵan. Ol 2022 jylǵy Azııa oıyndarynda qolaǵa qol sozdy.
Al Nurlyhan jubanysh fınalynda nıderlandtyq Katarına Sımeondy jeńdi. Tartysty kezdesý golden skorge deıin sozyldy. Qosymsha ýaqytta Nurlyhan vazarı upaıyn enshilep, Qazaqstan qorjynyna úshinshi qola júldeni saldy.
Nurlyhan Sharhan 2000 jyly 18 sáýirde Qyzylorda qalasynda dúnıege kelgen. Ol – dzıýdo kúresinen halyqaralyq dárejedegi sport sheberi. 2023 jyly Hanchjoý qalasynda Azııa oıyndarynyń qola júldesin aldy. Sondaı-aq sol jyly Azııa oıyndarynda jáne Parıjdegi «Grand Slam» týrnırinde úzdik úshtikten kórindi. 2022 jyly Azııa chempıonatynda qola medal aldy. Elimizdiń birneshe dúrkin jeńimpazy jáne júldegeri bolǵan.
Bul kúni Abylaıhan men Nurlyhannan ózge el quramasynan Ádilet Almat (81 keli), Aıdar Arapov (90 keli), Marat Baıkamýrov (100 keli), Ǵalymjan Qyryqbaı (100 keliden joǵary) baq synady.
Eske salsaq, týrnırdiń alǵashqy jarys kúni, 7 aqpanda el quramasynan Aman Baqytjan (60 keli) qola júldeger atandy.
Bedeldi básekede Qazaqstan quramasynan 60 kelide Sherzod Davlatov, 66 kelide Ǵusman Qyrǵyzbaev pen Baýyrjan Narbaev, 73 kelide Eset Qýanov pen Dastan Shaıahmetov jarys jolyn erte aıaqtady.
Aıta keteıik, jańa sport maýsymynyń alǵashqy álemdik reıtıngilik týrnırine 78 elden 488 dzıýdoshy baq synap jatyr.
Buǵan deıin Grand Slam týrnırinde qazaqstandyq balýandar 8 aqpanda kimdermen beldesetinin jazǵanbyz.