Parıjdegi 400 jyldyq tarıhy bar eń kóne jabyq bazar órtenip ketti
ASTANA. KAZINFORM – Parıjde bolǵan iri órt saldarynan Frantsııa astanasyndaǵy eń kóne jabyq azyq-túlik bazary – Anfan-Rýj (Marché des Enfants Rouges) tolyqtaı joıyldy, dep habarlaıdy BBC.
1615 jyly negizi qalanǵan bul bazar kóshe taǵamdarymen tanymal bolǵan jáne álemdegi eń úzdik on bazardyń qataryna turaqty túrde enip kelgen.
Frantsýz BAQ-tarynyń málimetinshe, órt túngi saǵat úsh shamasynda bastalǵan. Birneshe saǵat ótse de, órt sóndirýshiler janyp ketken nysannyń qaldyqtaryn sýmen salqyndatý jumystaryn jalǵastyrǵan.
Ázirge órttiń shyǵý sebebi anyqtalǵan joq.
– Biz oqıǵa ornyna jetken kezde órt kúsheıip ketken edi. Jalyn jabyq bazardyń búkil ishki aýmaǵyn sharpydy, – dedi órt sóndirý qyzmetiniń ókili Per de Býve.
Onyń aıtýynsha, tilsiz jaý 1000 sharshy metr aýmaqqa jaıylǵan.
– Bazar tolyqtaı qırady. Ǵımarattyń ózi de, metall qurylymdary da túgel joıyldy. Qutqarýshylardyń basty mindeti órttiń bazar ústindegi turǵyn úıler men dúkenderge taralýyna jol bermeý boldy, – dep túsindirdi ol.
Oqıǵa ornyna tańerteń erte kelgen Parıjdiń ortalyq aýdandarynyń meri Arıel Veıl Le Parisien basylymyna bazardyń tolyǵymen janyp ketkenin aıtty.
– Qazir tańǵy saǵat jeti. Adamdar men saýdagerler kele bastady. Anfan-Rýj bazary tolyǵymen joıyldy, túgi qalmaı órtenip ketti, – dedi ol.
Mer órt sóndirýshilerdiń jedel áreketiniń arqasynda jalynnyń kórshiles ǵımarattarǵa taralýyna jol berilmegenin atap ótti.
– Abyroı bolǵanda, órt sóndirýshiler óte jyldam jetti. Kóptegen arnaıy tehnıka jumyldyryldy. Onyń ústine olar bul aýmaqty jaqsy biledi. Sonyń arqasynda budan da aýyr zardaptyń aldyn alýǵa múmkindik týdy, – dedi Arıel Veıl.
Aıta keteıik, buǵan deıin Frantsııanyń soltústik-shyǵysyndaǵy Mets qalasynda ornalasqan Fransýa Rable kolledjinde órt shyqqany habarlanǵan bolatyn. Oqıǵaǵa baılanysty qasaqana órteý nusqasy qarastyrylǵan.
