Parıjde jaýǵan qar shamamen 900 km sozylǵan kólik keptelisin týdyrdy

ASTANA.KAZINFORM — Tsıklon Batys Eýropanyń kóp bóligine qar ákeldi. Qalyń qar jaýǵan elder qatarynda Nıderland, Belgııa jáne Frantsııa da bar, dep habarlaıdy Kazinform agenttiginiń menshikti tilshisi. 

Frantsýz BAQ-tarynyń habarlaýynsha, eldegi 26 órt sóndirý bólimi joǵary daıyndyqta (qyzǵylt sary dabyl deńgeıi), Parıjdegi aýa raıynyń qolaısyzdyǵyna baılanysty el astanasynda 240 qońyraý túsken.

Sharant-Marıtım departamentinde 35 santımetrge deıin qar jaýdy, al Frantsııanyń meteorologııalyq qyzmeti bul jolǵy qar «erekshe» dep sıpattady.

Seısenbi kúni Normandııada, Paı-de-Lýar aımaǵynda jáne Il-de-Frans pen Bretandegi basqa departamentterde oqýshylardy tasymaldaý toqtatyldy.

Frantsııa astanasy men onyń mańyndaǵy aýdandarda qar jaýýy jáne Rojdestvo men Jańa jyl merekelerinen keıin demalýshylardyń kelýine baılanysty kólik keptelisi rekordtyq deńgeıge jetti.

Memlekettik Sytadin portaly 5 qańtarda kúndiz Frantsııa avtojoldarynda shamamen 900 km kólik keptelisi bolǵanyn habarlady. Ońtústikke qaraı júretin A6, A7 jáne A10 avtojoldarynda kólik keptelisi erekshe boldy, sebebi qańtar aıynyń osy kezeńi demalýshylardyń kýrorttardan jappaı ketip, úılerine oralatyn ýaqyty taıaǵan.

Buǵan deıin TJM aýa raıyna baılanysty turǵyndarǵa eskertý jasaǵan bolatyn.