Parıjde Janna d’Ark músininiń qylyshy urlandy

ASTANA. KAZINFORM — Frantsııanyń ulttyq qaharmany Janna d’Arktyń Parıjdiń VIII okrýginde ornalasqan músinindegi qylyshty urlaǵan er adamdy polıtsııa ustady. Bul týraly TASS habarlaıdy.

Basylymnyń jazýynsha, urynyń bul áreketke ne úshin barǵany jáne qarýdy qandaı maqsatta qoldanbaq bolǵany ázirge belgisiz.

Er adam Sen-Ogıýsten alańynyń ortasyndaǵy músinge shyǵyp, at ústinde beınelengen jaýynger áıeldiń qolyndaǵy qylyshty julyp alǵan. Qolyna qylyshty ustap, kórshi kóshege qaraı qashqan uryny sol jerde polıtsııa qyzmetkerleri ustaǵan.

Polıtsııa ókilderi er adamnyń psıhıkalyq jaǵdaıyn anyqtaý úshin minez-qulyqtyq saraptama júrgizýdi josparlap otyr.

Aıta keteıik, Janna d’Arktyń at ústindegi músinin frantsýz músinshisi Pol Dıýbýa XIX ǵasyrdyń ekinshi jartysynda jasaǵan. Bul músinniń tórt birdeı nusqasy bar, olar Parıj, Reıms, Strasbýrg qalalarynda jáne AQSh-tyń Vashıngton qalasynda ornatylǵan.

Alaıda Frantsııa astanasyndaǵy Janna d’Arkqa arnalǵan eń tanymal eskertkish — Lývr mýzeıi mańyndaǵy Pıramıdalar alańynda ornalasqan altynmen aptalǵan qola músin. Onda Orlean qyzy dýlyǵasyz, qolynda uzyn sapty tý ustap, at ústinde beınelengen.

Buǵan deıin Parıjde taǵy bir tonaý oqıǵasy tirkelgeni habarlanǵan edi: kýrerden 150 myń eýroǵa baǵalanǵan áshekeı buıymdar urlanǵan.