Parıjde ushatyn taksı iske qosylady
NUR-SULTAN. QazAqparat - 2024 jyly jazǵy Olımpıada oıyndarynyń qarsańynda Parıjde ushatyn pılotsyz taksı qyzmeti iske qosylady. Bul týraly Airbus kompanııasynyń ókilderi Le-Býrjede ótken 53-inshi Halyqaralyq ǵarysh konferentsııasynda aıtty. Phys.org portalynyń habarlaýynsha, ushatyn taksı qyzmeti jolaýshylardy Sharl-de-Goll áýejaıynan qala ortalyǵyna qaraı tasymaldaıtyn bolady.
Jobany Germanııa men AQSh-ta eki top ázirlep jatyr. Konferentsııada mamandar amerıkalyq kompanııa kóliginiń modelin tanystyrdy. «Vahana» dep atalatyn ushatyn apparat elektr togymen qozǵalady jáne pılottan basqa bir jolaýshyǵa arnalǵan. Kólik ataýyn ǵalymdar úndi mıfologııasynan alǵan. Kompanııa ókilderiniń aıtýynsha, osy kúnge deıin ushatyn taksı 80 ret synaqtan ótkizilgen. Taksı jyldamdyǵy saǵatyna 160 shaqyrymdy quraıdy.
«Airbus basshylyǵy 2024 jazǵy olımpıadada «frantsýz noý-haýy» barsha álemge tanystyrylatynyn aıtty. Airbus kompanııasynyń bas dırektory Gııom Forıdiń aıtýynsha, Olımpıadaǵa deıin barlyq talaptarǵa saı eki joba bir kólikke kiriktiriledi», - dep jazady portal.
Al Sharl-de-Goll áýejaıynyń ókilderine sensek, jospar boıynsha aerotaksı ár alty mınýt saıyn ushyp otyrady. 2019 jyldyń sońyna deıin áýejaı aerotaksı qyzmetine arnaıy jer bóledi. Ony daıyndaý úshin 10 mıllıon eýro jumsalmaq.
«Frantsııanyń kólik mınıstri Elızabet Bornnyń aıtýynsha, áýe taksı qala ınfraqurylymyna tolyq enip ketýi úshin áli de kóp jumys atqarylýy kerek», - dep jazady avtor.
