Parıjde Ulttyq dombyra kúni atalyp ótti
PARIJ. QazAqparat - Senbi, Ulttyq dombyra kúni qarsańynda Qazaqstannyń Frantsııadaǵy elshiligi «Qorqyt» qazaq mádenıet ortalyǵymen birlesip, kontsert uıymdastyrdy, dep habarlaıdy «QazAqparat» HAA.
Kontsert Qazaqstannyń Frantsııadaǵy elshiliginiń ǵımaratynda ótti. Kórermenderdiń aldyna qazaqstandyq dıplomattar men olardyń otbasy músheleri, «Qorqyt» qazaq mádenıet ortalyǵy, sonymen qatar dısapora ókilderi men frantsýz azamattary asyrap alǵan balalary shyǵyp sóz sóıledi.
Óziniń kirispe sózinde Qazaqstannyń Frantsııadaǵy elshisi Jan Ǵalıev frantsııa jerin dombyramen kóp nárse baılanystyratynyn aıtty.
«Dombyra alǵash ret Parıjde 1925 jyly EKSPO kórmesinde kórsetilgen. Qazaq mýzyka óneriniń maıtalmany Ámire Qashaýbaev oınaǵan dombyranyń kúmbirlegen daýsyna tánti bolǵan frantsýzdar ol týraly buqaralyq aqparat quraldarynda jazdy»,-dedi dıplomat.
2014 jyly ıÝNESKO-nyń shtab-páterinde qazaqtyń dombyrada kúı tartý dástúri adamzattyń mádenı murasynyń tizimine endi.
J.Ǵalıev Ulttyq dombyra kúnine oraı Qazaqstan elshiliginde qazaq tilin jáne ulttyq aspaptarda oınaýdy úırenem (dombyra, qobyz, jetigen) deýshilerge arnaıy ortalyq ashylǵandyǵyn aıtty.
Kontserttik baǵdarlamany Qazaq mádenıeti ortalyǵynyń jas tálimgeri Mael Dekamp ashyp, fortepıanoda Abaıdyń «Kózimniń qarasy» ánin oryndady.
Dombyrashylar onda Ábdimomyn Jeldibaevtyń «Erke sylqym», Qurmanǵazynyń «Adaı», Seken Turysbekovtyń «Kóńil tolqyny» jáne kompozıtor Álshekeı Bektibaıulynyń «Tepenkógi» sııaqty týyndylarjy oryndady.
Qazaq tilin úırenbek bolyp júrgen Frantsýz Sharl Kýlbýa elimizde bolyp kelgennen keıin Abaı Qunanbaevtyń «Ǵylym tappaı maqtanba» atty óleńin udaıy mánerlep oqyp júretin bolǵan. .
Al jetigen aspaby arqyly frantsııalyq kórermender qazaqtyń mýzyka óneriniń týyndylarymen tanysty. Jetigende «Qorqyt» qazaq mádenıeti ortalyǵynyń daryndy tálimgerleriniń biri Arýjan Bolatqyzy qazaqtyń halyq áni «Búldirgendi» oryndap berdi.
«Qorqyt» qazaq mádenıet ortalyǵynyń jetekshisi, kóptegen mýzykalyq festıvaldardiń laýreaty Áıgerim Ersaıynovanyń jetigen shertýi jınalǵandardy tańdaı qaqtyrdy.
Kórermenderdi tań qaldyrǵan erekshe oqıǵa sahnaǵa Melvın Kleronyń shyǵýy boldy. Qara násildi ónerpaz «Dýdaraıdy» qazaq tilinde tamyljyta shyrqady.
Mýzykanttyń aıtýynsha, ony ónerge baýlyǵan qazaqstandyq dıplomat Berlın Irıshev eken. Ol sondaı-aq «Dýdaraımen» qatar Batyrhan Shúkenovtyń «Gúl Almatym» ánin de oryndady.
Qazaq dısporasynyń ókilderi «Sarjaılaý» ánin salǵanda qol shapalaqtamaǵan adam qalmady.
Ásel Noǵaıbaeva fortepıanoda qazaqtyń halyq ánderinen popýrı oryndady.
Kontsert sońynda qazaqstandyq dıplomat Murager Saýranbaev dombyrada, al «Qorqyt» qazaq mádenıeti ortalyǵynyń tálimgeri Áıgerim Mataeva fortepıanoda súıemeldep, Nurǵısa Tilendıevtiń «Kóńildi bıkesh» kúıin oryndady.
«Dıaspora ókilderimen jáne Frantsııa azamattary asyrap alǵan ballarmen birge bizde birneshe frantsýz qazaq tilin úırenip jatyr. Olardyń árqaısysynyń óziniń maqsaty bar. Keıbireýi Dımash Qudaıbergen týraly bilip alyp, fan-klýb qurǵylary keledi»,-dedi Áıgerim Mataeva.
2016 jyly qurylǵan «Qorqyt» qazaq mádenıet ortalyǵy qazaq tilin úırenip, ulttyq aspaptarda oınaýǵa, sondaı-aq kórkem shyǵarmashylyqpen aınalysýǵa múmkindik beredi. Maýsymnan bastap ortalyq Qazaqstan elshiliginiń ǵımaratyna ornalasty.
Kontsert qalyń kópshiliktiń kóńilinen shyqty. 1,5 saǵatqa sozylǵan, Ulttyq dombyra kúnine arnalǵan shara Parıj turǵyndarynyń esinde qalatyny sózsiz.
