Parıjde terakt jasamaq boldy degen kúdikpen úsh áıel qamaýǵa alyndy
ASTANA. KAZINFORM — Frantsııanyń terrorızmge qarsy prokýratýrasy áıelderge qylmys jasaý maqsatynda sóz baılasqan dep aıyp taqty. Bul týraly DW agenttigi jazdy.
Terrorızmge qarsy ulttyq prokýratýranyń (PNAT) habarlaýynsha, ustalǵandar ýaqytsha ustaý ızolıatoryna qamaldy.
Aıta keteıik, elde «Terrorıstik qylmystyq uıym qurý» týraly sot tergeýi 10 qazanda bastaldy. Derekkózder bul qastandyq kúzde ashylǵanyn jáne ustalǵandardyń jas shamasy 20-da ekenin aıtady. Olar jelide atys qarýy men oq ótkizbeıtin keýdesheler týraly aıtyp, shabýyl josparyn talqylaǵan. Sondaı-aq nysana retinde Parıjdegi kontsert zaly men bardy ataǵan.
Іstiń 2015 jylǵy teraktige qatysy bar
Derekkózdiń habarlaýynsha, bul tergeý 2015 jyldyń 13 qarashasyndaǵy shabýylda tiri qalǵan Salah Abdeslamǵa qatysty. Osy aptada ol Vanden-le-Veı túrmesindegi kamerasynda USB-dıskini zańsyz saqtaýyna baılanysty eki ret jaýapqa tartyldy. Parıjde ustalǵandardyń biri osy Abdeslamnyń áıeli. Ol temir torda otyrǵan kúıeýine jıhadtyq úgit-nasıhat jazylǵan fleshkany berdi degen kúdikke ilindi.
PNAT basshysy Olıve Krıstıen Frantsııadaǵy jıhadtyq qaýip sońǵy úsh jylda kúsheıgenin atap ótti.
Kelesi aptada elde 2015 jyly 130 adamnyń ómirin qıǵan jáne 350-den astam adam jaraqat alǵan lańkestik áreketterdiń qurbandaryn eske alý sharalary ótedi. Bul Frantsııadaǵy eń qandy terakt atalyp ketken.
Aıta keteıik, Federaldy tergeý bıýrosynyń qyzmetkerleri Helloýın merekesi kezinde Detroıt mańynda uıymdastyrylǵan teraktiniń aldyn aldy.