Parıjde sportshylarymyzdyń densaýlyǵyna jaýapty qansha maman bar - Bas dárigerdiń jaýaby
PARIJ. KAZINFORM – Jer betinde adam densaýlyǵynan baǵaly, ǵumyrynan bıik eshteńe joq. Sportshylarymyz da saý deneli bolǵanda ǵana bıik belesterdi baǵyndyra alady. Jarys bar jerde jaraqat ta bolyp jatady. Ondaı jaǵdaıda sportshylarymyzǵa kimder, qandaı dárigerler qol ushyn sozyp júr?
Búgin kazinform tilshisi osy suraqtarǵa jaýap alý úshin Parıj Olımpıadasynda júrgen Sport jáne týrızm mınıstrliginiń Ulttyq sporttyq medıtsına jáne ońaltý ortalyǵy Olımpıada oıyndary medshtabynyń bas dárigeri Berik Qyńyrbekovpen arnaı suhbattasqan edi.
- Berik Beısembaıuly, Olımpıada oıyndaryna kelgen sportshylarymyzdyń densaýlyǵyna jaýapty bas dáriger ekensiz. Sportshylarymyzǵa sizderdiń taraptan qandaı kómekter jasalyp jatyr?
- Jalpy sońǵy Tokıo Olımpıadasy oıyndarynan keıingi Parıj Olımpıadasyna deıingi tsıkldik merzimde ulttyń qurama sportshylaryna «Ulttyq sporttyq medıtsına jáne ońaltý ortalyǵy» qysqasha ortalyq tarapynan orasan zor jumystar atqaryldy. Ózderińizge málim, barlyq jazdyq olımpıadalyq sport túrlerinen Olımpıada lıtsenzııasyn ıemdený úshin túrli oqý-jattyǵý jıyndary, túrli álemdik jáne respýblıkalyq deńgeıde sport jarystary ótti.
Solardyń barlyǵynda bizdiń ortalyqtyń dárigerleri men emdik ýqalaýshylary (massajıst) óz úlesterin qosqan bolatyn. Sonyń ishinde birinshiden - medıtsınalyq-bıologııalyq qamtamasyz etý, sonyń ishinde farmakologııalyq dári-dármekpen jabdyqtaý jáne mamandarmen qoldaý, ekinshiden - jylyna eki ret tereńdetilgen medıtsınalyq tekseristen ótý, úshinshiden - komanda dárigeriniń taǵaıyndaýy boıynsha, sondaı-aq komanda basshylarymen, bas jattyqtyrýshymen kelisilgen kezeńdegi medıtsınalyq tekseristen ótý, tórtinshiden - ortalyqta jáne ortalyqtan tys jasalǵan jaraqat, syrqattardan keıingi qalpyna keltirý jumystaryn júrgizý, besinshiden - iri lıtsenzııalyq týrnırlerde, Álem jáne Azııa chempıonatynda pısıho-emotsıonaldyq qoldaý, altynshydan - Parıj Olımpıadasyna lıtsenzııa alǵan sportshylarǵa tolyqqandy mamandarmen, medıko-bıologııalyq, farmakologııalyq kómek kórsetý jumystary kiredi.
- Jalpy Olımpıada oıyndaryna qansha dáriger, qansha massajıst keldińizder?
- Olımpıada oıyndaryna Sport jáne týrızm mınıstrligi «Sportty damytý dırektsııasy» tarapynan dárigerlerge úlken qoldaý bildirgenin kórip otyrmyz. Óıtkeni sońǵy Tokıo 2021 Olımpıadasymen salystyrǵanda sportshylarǵa qoldaý retinde kelgen dárigerler men massajıstter sany birneshe ese kóp. Naqty aıtqanda olımpıadalyq aýylda jalpy 12 maman bar. Olar: bas dáriger - 1, dárigerler - 5, dáriger (psıholog) - 1, emdik ýqalaýshy ( massajıst) - 5 maman bar. Sondaı-aq, qosymsha olımpıadalyq aýyldan tys 2 dáriger, 9 emdik ýqalaýshy (massajıst) bar. Jalpy, Parıj olımpıadasynda 23 maman jumys atqaryp jatyrmyz. Aıta keterlik jaıt, barlyq dáriger men massajıstter eń birinshi bekitilgen sport túri boıynsha jarys kestesi bitkenge deıin jumysyn atqaryp, bitken soń komandamen birge elimizge oralady. Aldyn ala «Sportty damytý dırektsııasy» jáne «Ulttyq Olımpıadalyq komıtet» birge aqyldasyp, kezekshilik kestesi boıynsha jumystaryn atqarýda.
- Sizderdiń negizgi, naqty atqaratyn qyzmetterińiz qandaı?
- Bizdiń negizgi mindetimiz ulttyq qurama sportshylaryn, QR delegatsııasyna medıtsınalyq-bıologııalyq, alǵashqy kómek kórsetý. Jalpy fızıkalyq júktemeden keıingi jáne syrqat, jaraqattardan keıingi qalpyna keltirý (reabılıtatsııa) jáne jarys aldynda, jarystan keıingi pısıho-emotsıonaldyq qoldaý is-sharalaryn atqarý.
- Eger bir sportshy jattyǵýda, ne bolmasa jarys barysynda jaraqat alyp qalsa, ary qaraı jarysqa jibermeýge sizder pármen bere alasyzdar ma?
- Eger sportshy osyndaı jaýapty jarys aldynda nemese keıin qandaı da bir jaraqat alyp jatsa, eń birinshi komanda dárigeri tikeleı komanda basshylarymen aqyldasylyp, sońynda bas dárigerlermen birge konsılıým jasalyp, birjaqty sheshimi shyǵarylady. Jalpy, bul jaraqattyń túr-sıpatyna, aqyry qandaı aýyr jaǵdaıǵa ákelýi múmkin asqynýlar jáne eń bastysy sportshynyń densaýlyǵyn birinshi orynǵa qoıyp sheshiletin protsess.
- Áńgimeńizge rahmet!
