Parıjde paranji kıgen opera kórermeni zaldan qýyldy
ASTANA. QazAqparat - Parıjdegi Grand-opera teatrynyń ákimshiligi keıbir ártisterdiń talap etýimen paranji kıgen áıeldiń zaldan ketýin suraǵan. Olarǵa onyń kıimi unamaǵan, dep jazady «Rosbalt».
3 qazanda sahnalanǵan «Travıatanyń» ekinshi akti kezinde birinshi qatarda paranji kıip, betin de búrkep alǵan áıeldiń otyrǵanyn habarlaǵan «Frans Press» agenttiginiń aqparatyn Opera teatry dırektorynyń orynbasary Jan Fılıpp Tele rastady. Onyń aıtýynsha, tipti, birneshe ártis «erekshe» kórermen aldynda án aıtqysy kelmeıtinin bildirgen. Antrakt kezinde polıtsııa qyzmetkeri áıel men onyń serigine (olar arab elinen kelgen týrıster bolyp shyqty) áıeldiń ne betin ashýy kerektigin, bolmasa ǵımarattan ketýi kerek ekenin aıtqan. Sodan keıin erli-zaıyptylar teatrdan ketip qalǵan. 2011 jyly Frantsııada qoǵamdyq oryndarda betin búrkep júretin kıim kııýge bolmaıdy degen zań qabyldanǵan bolatyn. Ol úshin 150 eýro mólsherinde aıyppul jazylǵan.
