Parıjde ótken qazaq-frantsýz saıası konsýltatsııalary strategııalyq áriptestikti rastady
ASTANA. QazAqparat - Qazaqstan Syrtqy ister mınıstriniń orynbasary Roman Vasılenkonyń ústimizdegi jylǵy 9-10 sáýirde Parıjde ótkizgen kelissózderiniń nátıjeleri qos taraptyń qazaq-frantsýz strategııalyq áriptestigin ary ǵaraı nyǵaıtýǵa múddeliligin kórsetti.
Bul týraly QazAqparat QR SІM baspasóz qyzmetine silteme jasap habarlaıdy.
Frantsııanyń Eýropalyq jáne syrtqy ister mınıstrliginiń Memlekettik hatshysy, Ekonomıkalyq yntymaqtastyq boıynsha qazaq-frantsýz úkimetaralyq komıssııasynyń Teń tóraǵasy Jan-Batıst Lemýanmen kezdesýde taraptar ekijaqty formatta jáne kópjaqty alańshalardaǵy ózara yqpaldastyq máselelerin keńinen talqylady.
R. Vasılenko suhbattasyn Prezıdent Nursultan Nazarbaevtyń ózekti áleýmettik-ekonomıkalyq reformalary men halyqaralyq bastamalary jaıynda habardar etti. Bıyl Qazaqstan men Frantsııa arasyndaǵy strategııalyq yntymaqtastyq jónindegi shartqa qol qoıylýynyń 10 jyldyǵy ekenin eske saldy. Sondaı-aq, ol Astananyń Frantsııamen ózara senimdi saıası dıalogty nyǵaıtýǵa jáne dástúrli ekonomıkalyq yntymaqtastyqty keńeıtýge múddeli ekenin atap ótti. Óz kezeginde frantsýz saıasatshysy negizgi baǵyttar boıynsha Qazaqstanmen ózara yqpaldastyq deńgeıine joǵary baǵa berdi.
Qazaqstan Prezıdenti Frantsııa Prezıdenti Emmanýel Makronǵa Astana qalasyna sapar jasaýǵa shaqyrý joldap, ol alǵyspen qabyldanǵany atap ótildi. Osyǵan oraı, taraptar bolashaq sapardyń maǵynaly mazmuny jáne eki memleket basshylarynyń kezdesýi úshin ózara qolaıly merzimderdi anyqtaý boıynsha jumys isteýge nıetti.
R. Vasılenko qazaq-frantsýz turaqty saıası konsýltatsııalary Jetinshi kezeńiniń barysynda el delegatsııasyn, al Frantsııa tarapyn Eýropa jáne syrtqy ister mınıstrliginiń Qurlyqtyq Eýropa isteri jónindegi Bas dırektory Florans Manjen basqardy.
Suhbattasýshylar eki memleket arasyndaǵy ekijaqty jáne kópjaqty kún tártibindegi máseleler boıynsha, sonyń ishinde Qazaqstannyń 2017-2018 jyldary BUU Qaýipsizdik Keńesine músheligi aıasynda tıimdi yntymaqtastyq sıpatyn atap ótti. F. Manjen Qazaqstannyń óńirlik jáne jahandyq qaýipsizdikti nyǵaıtý jónindegi halyqaralyq kúsh-jigerine eleýli úlesin atap ótti.
Kelissózder barysynda Ortalyq Azııa memleketteri arasyndaǵy qarym-qatynastarynyń jaǵymdy serpinine jáne qazirgi tańda óńir boıynsha pysyqtalyp jatqan Eýropalyq odaqtyń jańa Strategııasyna, Aýǵanstannyń turaqtanýyna járdemdesý boıynsha birlesken úlesterge, Sırııa boıynsha Astana protsesi sheńberindegi kópjaqty kelissózderge nazar aýdaryldy. Óńirlik ekonomıkalyq jáne ınfraqurylymdyq, onyń ishinde «Belbeý jáne Jol» bastamasy sheńberinde jobalardy júzege asyrý máselelerine, EAEO-nyń damýyna erekshe kóńil bólindi.
Ekonomıkalyq dıplomatııa mindetteri aıasynda taraptar kólik, energetıka, atom jáne aeroǵarysh óndiristeri, sondaı-aq eki el aımaqtary arasyndaǵy ortalyqsyzdandyrylǵan seriktestikti atap ótti.
Búginde Frantsııa Qazaqstan ekonomıkasyndaǵy besinshi iri ınvestor bolyp tabylady. QR-da frantsýz kapıtalynyń qatysýymen 140-tan astam kásiporyn sheteldik tikeleı ınvestıtsııalar retinde 13 mıllıard dollardan astam ınvestıtsııa salǵan. Ústimizdegi jyldyń mamyr aıynda Parıjde QR Elshiliginiń bastamasymen qazaqstan-frantsýz ınvestıtsııalyq forýmy ótetin bolady.
Sonymen qatar, R. Vasılenko frantsýz tarapyn elordamyzdyń aldaǵy 20 jyldyq mereıtoıyn merekeleý jáne onyń aıasynda oryn alatyn «Astana» Halyqaralyq qarjy ortalyǵynyń ashylý rásimi jaıynda habardar etti. Tsıfrlyq ekonomıka salasyndaǵy Frantsııanyń mol tájirıbesin jáne qorshaǵan ortany qorǵaý máseleleriniń basymdylyǵyn eskere otyryp, «EKSPO-2017» kórmesi ınfraqurylymynyń negizinde IT startaptar halyqaralyq tehnoparki jobalarynyń jáne «Jasyl» tehnologııalar men ınnovatsııalyq jobalardy damytý boıynsha halyqaralyq ortalyǵynyń jobalaryn iske asyrýda yntymaqtastyqqa shaqyrý seriktesterdi qyzyqtyrdy.
Elıseı saraıynda ótken Frantsııa Prezıdentiniń keńesshisi Alıs Rıýfomen kezdesýde taraptar Astana men Parıj arasyndaǵy joǵary jáne bıik deńgeıdegi saıası dıalogtyń ári qaraı damý keleshegin talqylap, bul dıalogqa jańa serpin berý boıynsha ózara múddeli ekenin atap ótti.
Mınıstr orynbasary sapar barysynda parlamentshiler, iskerlik qaýymdastyq, sarapshy toptar men qoǵam qaıratkerleriniń qatysýymen «Shýazel» zertteý ınstıtýtynyń alańynda «Frantsııadaǵy Qazaqstan dostary klýbynyń» ekijaqty qarym-qatynas tarıhyndaǵy alǵashqy otyrysyna qatysty.
