Parıjde «Nıettiler koalıtsııasynyń» kezdesýi ótti
ASTANA. KAZINFORM — Parıjde «Nıettiler koalıtsııasyna» múshe elderdiń kóshbasshylarynyń kezdesýi ótti. Jıynda Ýkraına men Reseı arasynda beıbit kelisim jasalǵan jaǵdaıda, Ýkraınaǵa qandaı qaýipsizdik kepildikteri beriletini talqylandy, dep habarlaıdy Kazinform menshikti tilshisi.
Kezdesý gıbrıdti formatta ótti. AQSh prezıdentiniń arnaıy ókili Stıv Ýıtkoff onlaın qatyssa, Parıjde jeke qatysqan tulǵalar qatarynda Ýkraına prezıdenti Vladımır Zelenskıı, Belgııa premer-mınıstri Albert Bart de Vever, Danııa premer-mınıstri Mette Frederıksen, Fınlıandııa prezıdenti Aleksandr Stýbb, Nıderlandy premer-mınıstri Dık Shof, Polsha premer-mınıstri Donald Týsk, Eýropalyq keńes tóraǵasy Antonıý Koshta jáne Eýropalyq komıssııa tóraıymy Ýrsýla fon der Lıaıen boldy. Qalǵan elderdiń basshylary jıynǵa vıdeobaılanys arqyly qosyldy.
Kezdesýdiń basty nátıjesi — Ýkraınaǵa qaýipsizdik kepildikterin daıyndaý. Bul kepildikter Máskeý men Kıev arasyndaǵy yqtımal beıbit kelisimnen keıin kúshine enýi tıis.
Frantsııa prezıdenti Emmanýel Makronnyń aıtýynsha, bul kepildikter 2025 jylǵy tamyzda Vashıngtonda ótken Ýkraına boıynsha sammıtten keıin «Nıettiler koalıtsııasy» elderiniń áskerı basshylyǵy tarapynan birlesip daıyndalǵan.
— Memleketter daıyndaǵan úlester búgin kúndiz qorǵanys mınıstrleri deńgeıinde asa qupııa túrde qujattalyp, maquldandy. Bul jumystyń aıaqtalǵanyn senimdi túrde aıta alamyz, endi ol saıası deńgeıde bekitiledi, — dedi Frantsııa prezıdenti.
Sonymen qatar, Frantsııa prezıdenti «Nıettiler koalıtsııasyna» múshe 26 el Ýkraınaǵa qaýipsizdik kepildigi retinde áskerı kúshterin qurlyqta, teńizde jáne áýede jiberýge daıyn ekenin málimdedi. Alaıda, eýropalyq áskerdiń naqty sany týraly aıtylmady.
Ýkraına prezıdenti Vladımır Zelenskıı bul kezdesýdi «sońǵy ýaqyttaǵy eń mańyzdy ári naqty ilgerileý» dep baǵalady.
Keıinirek AQSh prezıdenti Donald Tramp vıdeobaılanys arqyly jıynǵa qosyldy.
Kezdesýden keıin Makron AQSh-tyń bul qaýipsizdik kepildikterin qoldaıtynyn rastady jáne Vashıngton tarapynan resmı bekitý aldaǵy birneshe kún ishinde júzege asatynyn habarlady.
— AQSh bul protseste qatysýǵa nıetti ekenin anyq málimdedi. Bul jóninde eshqandaı kúmán joq, — dedi Frantsııa prezıdenti.
Budan buryn Pýtın Zelenskıımen kezdesýdi Máskeýde ótkizýdi usyndy.