Parıjde narazylyq aktsııasy barysynda 200-den astam adam ustaldy

ASTANA. QazAqparat – Quqyq qorǵaý qyzmetkerlerine qarsylyq kórsetkenderge kózden jas shyǵaratyn gaz ben sý atqyshtar qoldanyldy. Narazylyq áreketteri Frantsııanyń ózge de qalalarynda ótti, dep habarlaıdy QazAqparat Deutsche Welle agenttigine silteme jasap.

Parıjde úkimettiń bastamasymen qolǵa alynǵan zeınetaqy reformasyna qarsy narazylyq sharasyna 6 myńǵa jýyq adam shyqty. Qalanyń ortalyǵynda narazylyq bildirýshiler polıtsııamen qaqtyǵysyp, nátıjesinde 16 naýryzda 217 adam qamaýǵa alyndy.

Polıtsııa qyzmetkerlerine túrli zattardy laqtyryp, qarsylyq kórsetkenderge qarsy kózden jas shyǵaratyn gaz ben sý atqysh qurylǵylar qoldanyldy. Narazylyq aktsııalary Marsel, Dıjon, Nant, Renn, Rýan, Grenobl, Týlýza jáne Nıtstsa qalalarynda ótti.

AFP basylymynyń jazýynsha, Marselde sherýshiler birneshe dúkendi talqandaǵan. Nant pen Renne jáne Lıonda tártip saqshylary men ereýilshiler arasynda qaqtyǵys boldy.

Aıta keteıik, Frantsııada uzaq ýaqyt zeınetaqy reformasyna qarsy aýqymdy narazylyq sharalary ótti. Eldiń qalalarynda mıllıonǵa jýyq adam kóshege shyqty. Sonyń ishinde Parıjde ǵana 300 myń adam ereýildetken.

Áleýmettik saýalnama nátıjesi boıynsha, reformaǵa Frantsııa halqynyń 76% qarsy bolǵan. Alaıda elde myńdaǵan adamnyń qatysýymen ótken narazylyq sharalaryna qaramastan Frantsııa senaty kúdik týdyrǵan reformany qoldady. Reforma zeınetaqy jasyn 62-den 64-ke deıin kóterýdi kózdeıdi. Zań jobasy Parlamentta talqylaýǵa alyndy.