Parıjde narazylyq kezinde 855 adam ustaldy
ASTANA. KAZINFORM — Parıj polıtsııasy 17 qazandaǵy narazylyq aktsııalaryna qatysqan 855 adamdy ustady. Frantsııa polıtsııasy ustalǵandar sany rekordtyq kórsetkishke jetkenin málimdedi, dep habarlaıdy Kazinform agenttiginiń menshikti tilshisi.
Polıtsııanyń málimetinshe, oqıǵalar kezinde 13 polıtseı men eki órt sóndirýshi zardap shekken. Sonymen qatar narazylyqqa qatysýshylardyń biri qaıtys boldy. Onyń ólimi polıtsııa qyzmetkerleriniń áreketine baılanysty emes. Ol júrek jetkiliksizdiginen kóz jumǵan.
Polıtsııa qalada jappaı tártipsizdik kezinde tek tonaýmen aınalysýdy maqsat etken adamdardyń sany artqanyn da atap ótti.
Parıj meriniń birinshi orynbasary Lamııa El Aaraje qalada buryn-sońdy bolmaǵan zorlyq-zombylyq deńgeıi tirkelgenin aıtty.
— Biz áleýmettik talaptarǵa da, kúni boıy beıbit sherýge shyqqan myńdaǵan demonstrantqa da esh qatysy joq júıeli tonaý áreketteriniń kýási boldyq. Bul — naǵyz qasiret, — dedi ol Franceinfo telearnasynyń efırinde.
Kásipodaqtardyń málimetinshe, 17 qazanda Frantsııa boıynsha 800 myńnan astam adam kóshege shyqqan. Parıj, Nıtstsa, Týlýza, Lıon, Bordo, Marsel, Nant, Renn jáne Ger qalalarynda jappaı sherýler ótip, polıtsııamen qaqtyǵystar bolǵan.
Aıta ketelik Parıj kóshelerin tazalaýǵa kommýnaldyq qyzmetkerler úsh ese kóp jumyldyrylǵan edi.
