Parıjde mıllıarderdiń ota kezinde qaza tabýyna baılanysty dárigerler sottaldy

ASTANA. KAZINFORM – Frantsııa soty 2019 jyly belgııalyq mıllıarder Ehýd Lanıadoǵa jasalǵan kosmetıkalyq operatsııadan keıin onyń ólimine sebepker bolǵan eki medıtsınalyq qyzmetkerdi kináli dep tanydy.

BILD jazǵandaı, 65 jastaǵy kásipker Parıjdiń ortalyǵyndaǵy jekemenshik klınıkada jynys múshesin úlkeıtýge baǵyttalǵan operatsııa kezinde kóz jumǵan. Sot bul oqıǵany abaısyzda adam ólimine ákelý dep saralap, naýqastyń qaıtys bolýyna dárigerlerdiń kásibı qatelikteri men jaǵdaıdyń nasharlaýyna ýaqtyly áreket etpeýi sebep bolǵanyn atap ótti.

Sot materıaldaryna sáıkes, jedel járdem qyzmeti kesh shaqyrylǵan, al reanımatsııalyq sharalar der kezinde júrgizilmegen. Sonymen qatar operatsııa jasaǵan hırýrgtiń Frantsııa aýmaǵynda medıtsınalyq qyzmetpen aınalysýǵa ruqsaty bolmaǵany, al klınıka basshysynyń tıisti medıtsınalyq sertıfıkattary joq ekeni anyqtaldy.

Sot sheshimimen klınıka dırektory 15 aıǵa shartty túrde bas bostandyǵynan aıyrylyp, 50 myń eýro kóleminde aıyppul tóleýge mindetteldi. Al hırýrg 12 aı shartty jaza alyp, 20 myń eýro aıyppul arqalady. Eki tulǵaǵa da ómir boıyna medıtsınalyq qyzmetpen aınalysýǵa tyıym salyndy.

Belgili bolǵandaı, Ehýd Lanıado atalǵan klınıkanyń turaqty klıenti bolǵan. Protsedýra barysynda onyń júregi toqtaǵan. Kásipker Omega Diamonds kompanııasy arqyly baılyq jınap, almaz naryǵynyń mamany retinde tanylǵan. Ol qaza tapqan sátte Belgııada salyqtan jaltarý isi boıynsha sotty kútip júrgen.

Aıta keteıik, Parıj metrosyndaǵy qylmystyq oqıǵaǵa baılanysty kúdikti qamaýǵa alyndy.