Parıjde mektep muǵaliminiń ólimine kúdikti alty jasóspirimniń soty bastaldy

Parıjde 2020 jyly qylmysker qolynan qaza tapqan mektep muǵalimi Samıýel Patıdiń ólimi boıynsha alty jasóspirimge qatysty sot isi bastaldy. Kazinform bul týraly VVS-ge silteme jasap.

Samıýel Patı sabaq kezinde oqýshylarǵa Muhammed paıǵambardyń karıkatýrasyn kórsetkeni úshin Sheshenstan týmasy onyń basyn kesip alǵan. Bul jan túrshigerlik oqıǵa Parıj mańyndaǵy Konflan-Sent-Onorın qalasynda boldy.

Sol kezde 18 jasta bolǵan Anzorovty polıtsııa qylmys ornynda atyp tastady.

Jasóspirimder qylmyskerge muǵalimdi kórsetkeni úshin aıyptalyp otyr. Samıýel Patı qaza tapqan kezde oqýshylar 13-15 jas shamasynda edi, olar eki jarym jylǵa deıin bas bostandyǵynan aıyrylýy múmkin.

Jergilikti BAQ habarlaýynsha, olar jasóspirimder isi boıynsha sotqa kelgende bet-júzin jasyrýǵa tyrysqan. Eń jas kúdikti Patı óltirilgen kezde 13 jasta ǵana boldy. Ol muǵalimi qaza tappaı turyp toǵyz kún buryn basqa sebeppen sabaqtan shettetilgen eken.

Aıyptaýlar boıynsha, oqýshy Samıýel Patı ózin sabaqtan qýyp jibergenin aıtyp, ákesi Brahıma Chınaǵa shaǵymdanǵan. Onyń sózinshe, muǵalim musylmandardyń bári synyptan shyǵyp ketý kerek dep aıtqannan keıin ekeýi sózge kelip qalǵan. Biraq shyn máninde ol sol kúni sabaqqa qatyspaǵan bolyp shyqty.

Sodan keıin qyzdyń ákesi áleýmettik jelige beınerolık júktep, Patıdi jumystan shyǵarýǵa shaqyrdy.

Prokýrorlardyń pikirinshe, osy vıdeo sheshen Abdýllah Anzorovty Normandııadan Konflan-Sent-Onorın qalasyna 80 shaqyrym joldy artqa tastap kelip, qylmys jasaýyna sebep bolǵan.
Basqa bes kúdikti Anzorovqa mektepte Patıdi tanýǵa kómektesip, 300 eýro kóleminde syıaqy alǵan. Olardyń biriniń aıtýynsha, Anzorov oǵan mese Patı Muhammed paıǵambardyń karıkatýrasyn kórsetkeni úshin keshirim surap jatqanyn vıdeoǵa túsirgisi keletinin aıtqan.

Kelesi jyly Frantsııada osy ólimge qatysy bar segiz eresek adamǵa qatysty ekinshi sot protsesi bastalady. Olardyń qatarynda qyzdyń ákesi Brahıma Chına da bar.

Prokýrorlar Anzorovtyń eki dosyn da adam óltirýge kómekteskeni úshin aıyptap otyr.

Olardyń biri Anzorovqa qarý satyp alýǵa járdemdesse, ekinshisi Samıýel Patı sabaq bergen mektepke jetkizip tastaǵan.