Parıjde qazaqstandyq aspaz óz qolynan shyqqan taǵamdardy usynady
ASTANA. KAZINFORM - Parıjdegi bedeldi reıtıngke ıe «Frederic Simonin» meıramhanasynda qazaqstandyq shef aspaz Artem Kantsevtiń qolymen daıyndalǵan túski as usynylady. Bul týraly Kazinform-nyń menshikti tilshisi habarlaıdy.
Bul is-shara qonaqtary eki aspaz bir ýaqytta daıyndaǵan taǵamdardan aýyz tıedi. Aspazshylar -Frederık Sımonın men Artem Kantsev.
Frederık Sımonın áleýmettik jáne ekologııalyq gastronomııany nasıhattaı otyryp, halyqaralyq sahnada frantsýz taǵamdaryn tanytyp júrgen aspaz. Ol - 2020 jyly Frantsýz ulttyq aspazdyq akademııasynyń ádebı syılyǵyn jeńip alǵan jáne «Adal aspazdyń as úıi» kitabynyń avtory.
Artem Kantsev Qazaqstanǵa tanymal. Ol óz jumysynda zamanaýı tehnologııalardy, trendterdi, Qazaqstan aımaqtaryndaǵy dástúrli jáne jergilikti ónimderdi biriktirip, óz klıentterine erekshe gastronomııalyq tájirıbesin usynyp, qazaq taǵamdaryn jańa qyrynan tanystyrady.
«Qazaqstan Prezıdenti Qasym-Jomart Toqaevtyń osy aıdyń basynda Parıjge jasaǵan saparynan keıin Qazaqstan men Frantsııa arasyndaǵy qarym-qatynasty odan ári nyǵaıtý maqsatynda, Frantsııadaǵy «Qazelles» qazaq áıelder qaýymdastyǵy gastronomııalyq dıplomatııa jobasyn qolǵa aldy. Bul biregeı joba — «mıshlen» juldyzyna ıe meıramhanamen birlesip júzege asyrylýda. Bul Qazaqstannyń qonaqjaılylyq ındýstrııasy úshin úlken qadam bolmaq. Joba aıasynda eki eldiń mádenıeti jaqyndasyp, bolashaqta Frantsııanyń úzdik meıramhanalarymen tyǵyz yntymaqtastyq ornatylady dep úmittenemiz.» - dedi Frantsııadaǵy qazaq áıelderi qaýymdastyǵynyń prezıdenti Larısa Indjýdjıan.
Aıta ketsek, Parıj tek Frantsııanyń emes, búkil Eýropanyń aspazdyq ortalyǵy sanalady. Gýrmandar bul qalaǵa álemniń ár túkpirinen arnaıy keledi. Keıbir ǵasyrlar boıǵy tarıhy bar meıramhanalarda aspazdyq óner bıik dárejede, al taǵamdary óner týyndylaryna aınalǵan.
