Parıjde Qazaq mádenıeti men sán óneriniń tanystyrylymy ótti
ASTANA. QazAqparat - Qazaqstan Respýblıkasynyń Tuńǵysh Prezıdenti Kúni qarsańynda Parıj qalasynda QR Prezıdenti Nursultan Nazarbaevtyń bastamasymen usynylaǵan «Rýhanı Jańǵyrý» baǵdarlamasy aıasynda mádenı-etnografııalyq is-shara uıymdastyryldy.
Іs-shara barysynda tanymal qazaqstandyq sángerler - «Zeken Moda» brendiniń negizin qalaýshy Qaırolla Ábishev, «Aspara» sán úıiniń negizin qalaýshy Aıdarhan Qalıev pen zerger-sýretshi Nurdos Áliasqarov óz kollektsııalaryn usyndy, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.
Qazaqstan Respýblıkasynyń Frantsııadaǵy Elshisi Jan Ǵalıev óz quttyqtaý sózinde qazaq halqynyń baı jáne biregeı tarıhı murasyn jandandyrý jáne Qazaqstandy jańǵyrtýǵa arnalǵan «Qazaqstan-2050» strategııasy, «Rýhanı Jańǵyrý» jáne «Uly dalanyń jeti qyry» sııaqty Elbasynyń bastamalaryn halyqqa tanystyrdy.
«1 jeltoqsan kúni, bizdiń elimiz Qazaqstan Respýblıkasynyń Tuńǵysh Prezıdenti kúnin atap ótedi. Bizdiń halqymyz óziniń kóshbasshysy men reformatoryna úlken qurmetpen qaraıdy. Onyń strategııalyq kózqarasynyń arqasynda Qazaqstan álemdegi eń serpindi ekonomıkalardyń birine aınalyp, halyqaralyq arenada óz ornyn nyǵaıtýǵa jáne óz mádenıeti men qundylyqtaryn ilgeriletýge múmkindik aldy. Qazirgi kezde Qazaqstan álemdik qoǵamdastyq aldynda óńirlik jáne ǵalamdyq máselelerdi sheshýge úles qosyp, jaýapty, senimdi talap etetin seriktes retinde qurmetke ıe», - dedi Qazaqstan Elshisi.
Ejelgi dástúrlerdiń úılesimdi birigýi men jańǵyrýy jáne rýhanı jańartý taqyryby boıynsha kórsetilgen kollektsııalardy kórermender qoshemetpen qarsy aldy. Merekelik shara barysynda óner kórsetken belgili «Bastaý» dombyrashylarynyń dýeti jáne halyq ánshisi, Qazaqstan Respýblıkasynyń eńbek sińirgen qaıratkeri Gúlnur Orazymbetova, sondaı-aq qonaqtarǵa jaıylǵan dástúrli qazaq dastarqany elimizdiń ulttyq ereksheligin tanytty.
«Bolashaǵy jarqyn Qazaqstan halyqaralyq bedelin nyǵaıta otyryp, turaqty jáne maqsatty túrde alǵa jyljyp keledi. Qazaqstan Prezıdenti N. Nazarbaev myrza bul jolda úlken jumys jasady. Ol kisiniń kóregendigi men pragmatızminiń arqasynda memleket búgin qarqyndy damyp keledi. Prezıdenttiń kópetnıkalyq halyqtyń mádenıetin jandandyrý jáne birligin nyǵaıtý jónindegi bastamalary memlekettiń basty baǵyty bolyp tabylady» - dedi «Vladi France Conseil» kompanııasynyń dırektory, «Dıplomatııalyq jarshy» atty jýrnaldyń bas redaktory Dıde Vıdal.
«Búgingi kórgen dızaınerlerdiń erekshe talǵamy bar, jalpy men sángerlerdiń bul jaǵyn asa baǵalaımyn. Shyǵarmashylyqta biregeı tásil men erekshe ıdeıalardy unatamyn. Biregeı ereksheligimen kózge túsetin jasampaz adamdarmen kezdesýdi árqashan qyzyǵa kútemin», - dedi «Oriental Fashion Week» prezıdenti, dızaıner Hınd Djýdar.
Bul shara Elshilik bastaǵan «Jahandaǵy zamanaýı qazaqstandyq mádenıet» jobasyn iske asyrýǵa baǵyttalǵan «Frantsııadaǵy Qazaqstan kúzi» atty mádenı maýsymdy qorytyndylady. Bul joba eýropalyq qoǵamdastyqtyń qazirgi zamanǵy ónerdegi damý protsesteriniń joǵary deńgeıin kórneki túrde kórsetýge múmkindik berdi.
