Parıjde ıslam ınstıtýty ashylýy múmkin
ASTANA. 16 aqpan. QazAqparat - Parıjdegi tanymal Dourous.net musylmandar uıymy ıslam dini men arab tilin oqytatyn ınstıtýt ashýdy kózdep otyr. Aldaǵy ýaqytta bul mekeme dáriske qatysýǵa múmkindigi joq yntaly topty ınteraktıvti onlaın-kýrs arqyly qashyqtyqtan oqytýǵa bel baılap otyr. Bul jaıynda ajib.fr aqparattyq portaly habar taratty.
Dourous.net-tiń tanymal bolatyn jóni bar. Atalmysh uıym Frantsııada ıslamdy nasıhattaýmen baılanysty talaı qaıyrymdylyq jáne mádenı is-sharalar uıymdastyrýǵa uıytqy boldy. Osy joly qolǵa alyp otyrǵan jobasy eldegi jastardy tárbıeleýge arnalǵanyn aıta ketý kerek.
muslim.kz saıtynyń jazýynsha, qazirgi ýaqytta Frantsııada musylmandarǵa arnalǵan, mamandandyrylǵan bilim oshaqtary jetispeıdi. Musylman jastary men dindi endi qabyldaǵandar bilim alý úshin shetelge shyǵýǵa májbúr bolyp otyr. Uıym músheleriniń aıtýynsha, bul joba osy olqylyqtyń ornyn toltyryp, tilek bildirgen talapkerlerge dinniń qyr-syryn úıretedi.
Aldaǵy ýaqytta ashylatyn ınstıtýttyń oqý baǵdarlamasyna arab tili men Quran, fıhq (sharıǵat), táýjıd (Qurandy durys oqyp-úırený) kýrstary kiredi. Sondaı-aq, Paıǵambarymyz - Muhammed Mustafanyń (s.a.s.) ómirbaıany óz aldyna bólek oqytylady.
Aldyn ala jasalǵan esepke qaraǵanda, bul jobaǵa 500 myń eýro qarjy ketedi. Dourous.net ókilderiniń aıtýynsha, qazirgi ýaqytta frantsýz musylmandarynyń sadaqasynan 100 myń eýrodaı qarajat jınalǵan.
