Parıjde Ilon Masktiń X kompanııasynyń keńsesinde tintý júrgizildi
ASTANA. KAZINFORM - Parıj prokýratýrasy Ilon Maskke tıesili, X áleýmettik jelisiniń ıesi sanalatyn kompanııanyń Frantsııadaǵy keńsesinde tintý júrgzilgenin habarlady. Bul shara qańtar aıynda bastalǵan tergeý aıasynda júrgizilgen. Tergeýge X platformasynyń algorıtmderi beıtarap jumys istemeıdi degen shaǵymdar sebep bolǵan. Bul týraly Kazinform DW-ge silteme jasap habarlaıdy.
Basylymnyń jazýynsha, X kompanııasy algorıtmderiniń ádildigine qatysty aıyptaýlarǵa tap bolǵan.
Parıj prokýratýrasynyń kıberqylmysqa qarsy bólimshesi Frantsııanyń ulttyq polıtsııasyndaǵy osy baǵyttaǵy arnaıy bólimmen jáne Eýropolmen birlesip, Ilon Maskke tıesili X kompanııasynyń Parıjdegi ókildiginde tintý júrgizgen. Bul týraly prokýratýra X jelisindegi paraqshasynda málimdep, sonymen qatar osy áleýmettik jeliden ketetinin jáne budan bylaı basqa arnalar arqyly habar taratatynyn jazǵan.
Reuters agenttiginiń naqtylaýynsha, tintý 2025 jyldyń qańtarynda frantsýz parlamentshileriniń biriniń shaǵymy negizinde bastalǵan tergeý sheńberinde ótken. Áńgime «Qaıta órleý» partııasynan Ulttyq assambleıa depýtaty Erık Botorel jaıynda bolýy múmkin. Ol X jelisindegi «algorıtmderdiń birjaqtylyǵyna», platformany Ilon Mask satyp alǵannan keıin onyń basqarý júıesine aralasý anyq ekenine nazar aýdaryp, bul jelide «barshaǵa qaýipsiz ári syılastyqqa negizdelgen orta qalyptastyrý barǵan saıyn qıyndap bara jatqanyn» aıtqan. Sonymen qatar Frantsııadaǵy bir memlekettik mekemeniń kıberqaýipsizdik jónindegi dırektory da X-ke qatysty shaǵym túsirgen.
Onyń aıtýynsha, platforma algorıtmi eleýli túrde ózgerip, saıası turǵyda arandatýshy, násilshil, LGBT+ qaýymdastyǵyna qarsy jáne gomofobııalyq kontenttiń kúrt kóbeıýine jol ashqan.
Al 2025 jyldyń shilde aıynda X kompanııasy bul aıyptaýlardy saıası astary bar dep baǵalaǵan.
Tintý aıaqtalǵan soń Ilon Mask pen X kompanııasynyń burynǵy bas dırektory Lında ıAkkarıno 20 sáýir kúni Parıj prokýratýrasynda ótetin tyńdaýǵa shaqyrylǵany belgili boldy.
Budan bólek, Masktyń xAI kompanııasy ázirlegen Grok chat-botyna qatysty shaǵymdardan keıin tergeý aýqymy keńeıtildi. Bul chat-bot naqty adamdardyń fotosýretteri negizinde seksýaldyq sıpattaǵy beıneler jasaı alady degen kúdikke ilingen. Qazir tergeý sheńberinde, sonyń ishinde, balalar pornografııasynyń taralýyna járdemdesý jáne seksýaldyq mazmundaǵy dıpfeıkter arqyly beınequqyqty buzý kúdigi de qarastyrylyp jatyr.
Buǵan deıin Eýrokomıssııa iri tehnologııalyq kompanııalarǵa qatysty birneshe tergeýdi jaqyn aılarda aıaqtaýdy josparlap otyrǵany habarlanǵan. X áleýmettik jelisine salynǵan 120 mıllıon eýro aıyppuldan keıin jańa sanktsııalyq sheshimder qabyldanýy múmkin.
Osyǵan deıin Ilon Mask Grok jasandy ıntellekt modeline jalańash fotolarǵa qatysty eskertý jasaǵany týraly jazdyq.