Parıjde Frantsııa úkimetiniń bıýdjet saıasatyna qarsy narazylyq aktsııasy ótti

ASTANA.KAZINFORM — Frantsııada «Jalpyhalyqtyq eńbek konfederatsııasy» men ózge de kásipodaq uıymdarynyń uranymen myńdaǵan adam úkimettiń bıýdjet saıasatyna qarsy demonstratsııaǵa shyqty, dep habarlaıdy Armenpress.

Armenpress-tiń TASS agenttigine silteme jasap habarlaǵanyndaı, narazylar Parıjdiń tarıhı II okrýgindegi Bırja alańyna jınalyp, úkimettiń bıýdjet saıasatyna kelispeıtinin bildirdi. Qatysýshylar «Zeınetaqy úshin ereýilge shyǵamyz», «Qyzmetkerler men zeınetkerlerge teńdik», «Qatań únemdeý sharalaryna qarsymyz», «Áleýmettik jáne salyqtyq ádildik úshin» degen urandar jazylǵan plakattar ustap turdy.

Aktsııaǵa CGT bas hatshysy Sofı Bıne de qatysty.

2026 jyldyń bıýdjet jobasy qazirgi tańda Senatta (parlamenttiń joǵarǵy palatasy) qaralyp jatyr. Úkimet barlyq salalardaǵy shyǵyndardy qysqartýdy kózdep otyr, tek qorǵanys salasyna jumsalatyn qarajatty 6,7 mlrd eýroǵa arttyrmaq.

2025 jyly Frantsııa bıýdjetiniń tapshylyǵy JІÓ-niń 5,4%-yn qurap, eldiń nesıe berýshileri tarapynan senim tómendegen. Osyǵan baılanysty bılik tapshylyqty 2026 jyly 5%-dan, al 2029 jyly 3%-dan tómen deńgeıge jetkizýdi josparlap otyr.

Únemdeý sharalary aıasynda úkimet áleýmettik tólemderdi qysqartý, memlekettik medıtsınalyq saqtandyrý boıynsha franshızalardy ulǵaıtý jáne 2026 jyly zeınetaqylardy ındeksatsııalaýdan bas tartý nıetin bildirgen.

Osyǵan deıin Frantsııada kezekti ulttyq ereýil 2 jeltoqsanǵa josparlanǵany týraly jazdyq.