Parıjde Eýropa elderiniń qatysýymen Tramptyń beıbitshilik jospary talqylanady

ASTANA. KAZINFORM — AQSh ókilderi 13 jeltoqsan kúni Parıjde Ýkraına, Frantsııa, Germanııa jáne Ulybrıtanııanyń joǵary laýazymdy tulǵalarymen kezdesip, Donald Tramp usynǵan beıbitshilik josparyn talqylaıdy, dep habarlaıdy Axios basylymy.

Kelissóz Tramptyń Frantsııa prezıdenti Emmanýel Makronmen, Germanııa kantsleri Frıdrıh Mertspen jáne Ulybrıtanııa premer-mınıstri Kır Starmermen telefon arqyly sóıleskennen keıin josparlanǵan.

Basylymnyń habarlaýynsha, tórt eldiń delegatsııasyn ulttyq qaýipsizdik keńesshileri usynady. Alaıda Tramptyń ulttyq qaýipsizdik jónindegi keńesshisi qyzmetin atqaratyn Memlekettik hatshy Marko Rýbıonyń qatysý-qatyspaýy belgisiz.

Rýbıo buǵan deıin Jeneva kelissózderinde amerıkalyq delegatsııany basqarsa, qazir Ýkraınamen dıalogty arnaıy elshi Stıv Ýıtkoff pen Tramptyń keńesshisi Djared Kýshner basqarady.

Bir kún buryn Ýkraına AQSh-qa beıbitshilik josparynyń jańartylǵan nusqasyn usynǵan bolatyn. Qujatta aýmaqtyq daýlardy sheshýge qatysty jańa usynystar, sondaı-aq reseılik áskerdiń baqylaýyndaǵy Zaporoje atom elektr stantsııasyna qatysty máseleler bar.

Buǵan deıin Londonda Vladımır Zelenskıı «Nıettiler koalıtsııasynyń» jetekshilerimen kezdesti.