Parıjde ereýil polıtsııamen qaqtyǵysqa ulasty

NUR-SULTAN. QazAqparat - Frantsııada ereýil basylar emes. Narazylyq aktsııasy eldiń birneshe qalasynda ótti. Parıjdegi sherý sońy polıtseılermen qaqtyǵysqa ulasty, dep jazady «Habar 24».

Eldiń ishki ister mınıstrliginiń habarlaýynsha, narazylyq aktsııalaryna 26 myńnan asa adam qatysqan. Alaıda uıymdastyrýshylar ereýilge 133 myń adamnyń shyqqanyn aıtady.

Tártipsizdikter kezinde 150-ge jýyq adam qamaýǵa alynǵan.

Aıta ketken jón, qarashanyń sońynda Frantsııa parlamentiniń tómengi palatasy «Jahandyq qaýipsizdik týraly» zań jobasyn maquldaǵan. Sol ýaqyttan beri elde ereýilder basylmaı tur. Qujatta polıtseılerdiń sýretin ǵalamtorda jarııa etkeni úshin 45 myń eýro aıyppul nemese bir jylǵa bas bostandyǵynan aıyrý jazasy qarastyrylǵan.

Narazy toptyń aıtýynsha, qujat halyqtyń sóz bostandyǵyn shekteıdi. Al jýrnalıster «quqyq qorǵaýshylardyń qatysýymen túsirilim júrgizý qıyndaýy múmkin» dep otyr.