Parıjde dúken ıeleri jappaı tártipsizdikten qorǵanýǵa kiristi
ASTANA. KAZINFORM — 24 qazan kúni bolýy múmkin tártipsizdikterge baılanysty Parıj turǵyndary daıyndalyp jatyr. Dúken ıeleri saýda oryndarynyń qorǵanysyn kúsheıtip, adam ómirine qaýip tóndirmeıtin ózin-ózi qorǵaý quraldaryn belsendi satyp alýda. Bul týraly Kazinform agenttiginiń menshikti tilshisi habarlady.
17-18 qazanda ómir súrý qunynyń ósýine qarsy kásipodaqtardyń jalpyulttyq narazylyq aktsııasy kezinde jappaı tártipsizdik boldy. Osy oqıǵalardan keıin kóp kásipker, ásirese shaǵyn bıznes ıeleri, endi polıtsııanyń kómegine senbeıtinin málimdedi.
Jergilikti BAQ málimetinshe, sol kezde Parıjde 450-ge jýyq dúkenge zalal kelgen, onyń 228-i tonalǵan. El boıynsha keminde 3 myń kásipkerlik nysanǵa zııan kelgen.
Qazir Frantsııa astanasyndaǵy qarý-jaraq dúkenderinde saýda kólemi kúrt ósken. Parıjdegi eń kóne qarý-jaraq dúkenderiniń biri Armurerie de la Bourse ıesi ári Ulttyq qarý-jaraq satýshylar palatasynyń prezıdenti Iv Gollettıdiń aıtýynsha, ózin-ózi qorǵaıtyn quraldar 10 ese kóp satyla bastaǵan.
Suranysqa ıe taýarlardyń qatarynda kózden jas aǵyzatyn gaz jáne buryshty gel quıylǵan ballondar, elektrli shokerler, shoqparlar men rezeńke oq atatyn tapanshalar bar. Sońǵysy D sanatyna jatady jáne kámeletke tolǵan azamattarǵa arnaıy ruqsatsyz satylady. Osyndaı jaǵdaı Lıon, Lıll jáne Marsel qalalarynda da baıqalady.
Keıbir dúken ıeleri túnde de saýda oryndarynda qalýdy josparlap otyr. Basqalary vıtrınalaryn faner qalqandarmen jaýyp, kúzet ıtteri bar jeke kúzet qyzmetterin jaldap jatyr. Parıj polıtsııasynyń prefektisi Patrıs For kásipkerlerge joldaǵan hatynda qaýipsizdik sharalaryn kúsheıtýge, jumys ýaqytyn ózgertýge jáne jeke kúzet qyzmetterin tartý múmkindigin qarastyrýǵa keńes berdi.
Bılik senbi kúni quqyq qorǵaý kúshterin aýqymdy túrde jumyldyrýǵa daıyndalyp jatyr. Olardyń qatarynda «Sentınel» operatsııasyna qatysatyn áskerı qyzmetshiler men demalystan shaqyrylǵan CRS arnaıy bólimshesiniń qyzmetkerleri bar. Lıondy qosa alǵanda, birneshe qalada narazylyqqa shyǵýǵa tyıym salyndy. Parıjdiń keıbir aýdandarynda komendanttyq saǵat áli de kúshinde.
Medef jumys berýshiler birlestiginiń basshysy Patrık Marten kásipkerlerdi qaýipsizdikti óz qoldaryna almaýǵa jáne quqyq qorǵaý organdaryna senýge úndedi. Alaıda saýalnamaǵa qatysqan frantsýzdardyń edáýir bóligi «Óz qaýipsizdigimizdi ózimiz qorǵaýǵa májbúrmiz» dep esepteıdi.
Eske salaıyq, aldyńǵy demalys kúnderi Frantsııada bolǵan jappaı tártipsizdikter saqtandyrý tólemderiniń mólsheri jaǵynan eldegi eń iri oqıǵalardyń biri ekenin jazǵanbyz.
Qarjy sarapshylarynyń baǵalaýynsha, saqtandyrylǵan shyǵyn kólemi 1,2 mlrd eýroǵa jetýi múmkin. Financial Times saýalnama júrgizgen brokerler de shyǵyn 1 mlrd eýrodan asatynyn boljaıdy. Bul kórsetkish 2023 jyldyń jazynda bolǵan tártipsizdikterden kelgen 700-800 mln eýro shyǵynnan asyp tústi.
