Parıjde Dombyra kúni atalyp ótti

ASTANA. QazAqparat - Ulttyq Dombyra kúni merekesine oraı Qazaqstannyń Frantsııadaǵy Elshiligi kontsert uıymdastyrdy, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.

Onyń barysynda Qazaqstannyń eńbek sińirgen qaıratkeri, halyqaralyq konkýrstar men festıvalderdiń laýreaty, «Ónertaný» qaýymdastyǵynyń professory Erbolat Mustafaev birqatar tanymal jáne sırek kúılerdi oryndady.

Merekelik kontsertke Frantsııadaǵy qazaq jáne qyrǵyz dıasporalarynyń, qazaqstandyq azamattar men stýdentterdi biriktiretin qaýymdastyqtardyń ókilderi qatysty.

Qazaqstan Elshisi Gúlsara Arystanqulova men Qyrǵyzstan Elshisi Sadyk Sher-Nııaz sóz sóılep, ulttyq mádenıet pen biregeılikti saqtaý men qaıta jańǵyrtý isinde dombyranyń halyqtarymyzdyń asyl qazynasy retindegi erekshe mańyzyn atap ótti.

Іs-shara barysynda E. Mustafaev Qurmanǵazy, Dáýletkereı, Nurǵısa Tilendıev, Ábdimomyn Jeldibaevtyń jáne de basqa qazaq halqynyń ataqty kúıshileriniń shyǵarmalaryn oryndady. Sonymen qatar áıgili dombyrashy qonaqtarǵa osy ejelgi aspaptyń tarıhyna jáne qazaq kúıshi-kompozıtorlarynyń ómirine baılanysty oqıǵalar týraly áńgimeledi.

Mádenı sharaǵa qatysqan qazaqstandyqtar men dıaspora ókilderi de ulttyq aspapty meńgerý sheberlikterin kórsetti. Olar birlesip «Kúı tartys», «Kóńil tolqyny» jáne «Balbyraýyn» kúılerin oryndady.

Bul is-shara Qazaqstannyń mádenı murasyn elden tys jerlerde nasıhattaý jáne saqtaý jónindegi úlken bastamanyń bir bóligi retinde júzege asyryldy.