Parıjde Demeý Jadyraev álem birinshiliginiń fınalyna shyqty
ASTANA. QazAqparat - Frantsııanyń Parıj qalasynda kúres túrlerinen ótip jatqan álem chempıonatynda grek-rım kúresiniń sheberi 71 keli salmaqtaǵy beldesken balýanymyz Demeý Jadyraev fınalǵa shyqty, dep habarlaıdy QazAqparat tilshisi.
Bul týraly Parıjden Beıjiń olımpıadasynyń júldegeri Nurbaqyt Teńizbaev QazAqparat tilshisine áleýmettik jeli arqyly aıtyp berdi. Endi Jadyraev fınalda nemis balýanymen altyn medalǵa talasady. Fınal Astana ýaqytmen 23:00-de bastalady. Jarysty otandyq «KazSport» arnasy tikeleı efırde kórsetedi.
«Búgin bastalǵan dodada qazaqstandyq tórt balýan boz kilemge shyǵyp, bireýi fınalǵa shyqty. Osylaısha balýandarymyz álem birinshiligin sátti bastady», deıdi Nurbaqyt Teńizbaev.
Esterińizge sala keteıik, 26 tamyzǵa deıin jalǵasatyn álemdik dodaǵa álemniń eń myqty degen balýandary jınaldy. Bul birinshilikte kúrestiń úsh túrinen Qazaqstan namysyn 23 balýan qorǵamaq.
Frantsııa astanasynda ótetin dúbirli dodada erkin kúres pen qyzdar quramasy tolyq quramda óner kórsetedi. Al, grek-rım kúresiniń balýandary segiz salmaqtyń jeteýinde kúsh synasady. 130 keli salmaqta álemniń úsh dúrkin qola júldegeri Nurmahan Tinálıev te, sońǵy Qazaqstan chempıonatynda top jarǵan Damır Kúzembaev ta jaraqattaryna baılanysty Parıjdegi álem chempıonatyna qatysa almaıtyn boldy.
