Parıjde bireýler amerıkalyq banktiń ǵımaratyna bomba qoımaq boldy
ASTANA. KAZINFORM - Parıjde amerıkalyq bank ǵımaraty mańynda qoldan jasalǵan jarylǵysh qurylǵyny iske qospaq bolǵan er adam ustaldy, dep habarlaıdy Euronews.
Frantsııa polıtsııasy senbi kúni tańerteń yqtımal teraktiniń aldyn aldy. Bul týraly Frans Press tergeýge jaqyn derekkózderge silteme jasap habarlady.
Oqıǵa shamamen tańǵy saǵat 03:30 shamasynda Parıjdiń bedeldi 8-okrýgindegi de la Boetı kóshesinde, Elıseı alańdary mańynda bolǵan.
Qylmysqa qarsy kúres bóliminiń (BAC) qyzmetkerleri kúzetip turǵan ǵımarat mańynan qolynda ottyq ustaǵan er adamdy baıqap, onyń jarylǵysh qurylǵyny iske qospaq bolǵanyn anyqtaǵan. Qurylǵy ishinde shamamen 5 lıtr janǵysh suıyqtyq pen quramynda 650 gramǵa jýyq jarylǵysh untaǵy bar petarda bolǵan.
Le Parisien málimetinshe, ustalǵan kúdiktimen birge taǵy bir adam bolǵan, alaıda ol polıtsııa kelgen kezde qashyp ketken. Kúdikti ony Snapchat arqyly baılanysqa shyqqan adamdar jaldap, bul áreket úshin 600 eýro tólegenin aıtqan. Sondaı-aq ony oqıǵa ornyna belgisiz bireý kólikpen jetkizgenin jetkizgen.
Frantsııanyń ishki ister mınıstri Loran Nýnes tergeý júrip jatqanyn málimdedi. Іs Ulttyq antıterrorlyq prokýratýra baqylaýyna alynyp, polıtsııa prefektýrasynyń sot polıtsııasy basqarmasyna jáne DGSI tapsyrylǵan.
Parıj polıtsııasynyń ortalyq zerthanasyna kúdikti suıyqtyqty saraptaýǵa tapsyrma berilgen.
Antıterrorlyq prokýratýra «terrorıstik áreketpen baılanysty qaýipti quraldar arqyly zııan keltirýge oqtalý», «jarylǵysh nemese janǵysh qurylǵy jasaý», «mundaı qurylǵylardy saqtaý jáne tasymaldaý», sondaı-aq «terrorıstik qylmystyq top qurý» baptary boıynsha tergeý bastalǵanyn habarlady.
Aqpan aıynyń sońynda Izraıl men AQSh-tyń Iranǵa qarsy soqqylary bastalǵannan keıin Loran Nýnes eldiń qaýipsizdik kúshterin «joǵary daıyndyqta bolýǵa» shaqyrǵan edi. Bılik ókilderi bul qaqtyǵystyń Frantsııa aýmaǵyna yqtımal saldarynan qaýiptenip otyr.
Osyǵan deıin Frantsııada qala ákimdigine shabýyl jasalǵany týraly jazdyq.
