Parıjde avtobýs júrgizýshileri janarmaı baǵasyna qarsy narazylyqqa shyqty
ASTANA. KAZINFORM – Frantsııada Taıaý Shyǵystaǵy soǵys saldarynan kólik salasy qıyndyqtarǵa tap bolyp otyr. Parıjde sala qyzmetkerleriniń narazylyq aktsııasy ótti. Olar daǵdarys kezeńinde bılikten kóbirek qoldaý kórsetýdi talap etti, dep habarlaıdy Euronews.
Dúısenbi kúni Parıjde júk kóligi men avtobýs júrgizýshileriniń narazylyq aktsııasy ótti. Ony Eýropalyq avtomobıl kóligi uıymy uıymdastyrdy. Qalanyń aınalma jolynda shamamen eki júzge jýyq avtobýs baıaý jyldamdyqpen qozǵalyp, «ulý operatsııasyn» ótkizdi. Sonyń saldarynan jol qozǵalysy aıtarlyqtaı qıyndady.
Aktsııaǵa qatysýshylar janarmaı baǵasynyń ósýine narazylyq bildirip, bılikten kólik salasyna kóbirek qoldaý kórsetýdi talap etti. Osy aptada Lýara, Provans – Alpi – Lazýr jaǵalaýy, Oksıtanııa jáne Jańa Akvıtanııa óńirlerinde de osyndaı aktsııalar ótkizý josparlanǵan.
Kómek jetkiliksiz
Taıaý Shyǵystaǵy soǵystan qatty zardap shekken bul sala buǵan deıin de úkimetten qoldaý alǵan. Juma kúni ekonomıka mınıstri Roland Lescure men kólik mınıstri Philippe Tabarot kólik sektoryn damytýǵa 50 mıllıon eýro bólinetinin málimdedi.
Alaıda kásipodaqtyń frantsýz tilindegi baspasóz habarlamasynda bólingen bıýdjet jaǵdaıdyń kúrdeliligine, sala mamandary tap bolǵan qıyndyqtarǵa jáne 2022 jyly qabyldanǵan sharalarǵa sáıkes kelmeıtin sııaqty dep kórsetilgen.
Kásipodaq ókilderiniń aıtýynsha, eger atqarýshy bılik qazirgi ustanymyn ózgertpese, saldary aýyr bolýy múmkin.
– Jumystan qysqartýlar men bankrottyqtardan týyndaıtyn áleýmettik jáne ekonomıkalyq shyǵyndar búgin jarııalanǵan somadan áldeqaıda joǵary bolýy ábden múmkin, – dep málimdedi kásipodaq.
Aıta keteıik, aqpan aıynda grekııalyq fermerler traktorlarymen narazylyq aktsııasyn ótkizgen edi.
Al jýyrda AQSh pen Eýropa elderinde Tramptyń saıasatyna qarsy narazylyq aktsııalary ótti.
