Parıjde Almaty qalalyq sport basqarmasynyń basshysy Erden Haırýllın qaıtys boldy
PARIJ. KAZINFORM – Frantsııa astanasy Parıj qalasynda ótip jatqan Olımpıada oıyndaryna kelgen Almaty qalalyq sport basqarmasynyń basshysy Erden Haırýllın kenetten qaıtys boldy.
Bul aqparatty QR Týrızm jáne sport mınıstriligi de rastady.
«Ókinishke qaraı, Parıjde Almaty qalalyq sport basqarmasynyń basshysy Erden Haırýllınnen aıyrylyp qaldyq. Onyń kenetten júregi toqtap, qaıtys boldy. Ol arnaıy delegatsııa quramamynda bolǵan joq. Sportshylarymyzǵa qoldaý kórsetý úshin Parıjge arnaıy týrıst retinde kelgen bolatyn», - dedi QR Týrızm jáne sport mınıstriniń qoǵammen baılanys jáne BAQ jónindegi keńesshisi Dıas Ahmetshárip Kazinform tilshisine bergen jaýabynda.
Aıta keteıik, Erden Rashıduly Almatynyń sportyn 2022 jyldyń mamyr aıynan beri basqarady. Oǵan deıin Almaty qalasy Almaly aýdany ákiminiń orynbasary bolyp jumys istegen.
Eske sala keteıik, buǵan deıin Qazaqstan quramasy 7 tamyzda Olımpıadadaǵy medaldar sanyn jetige jetkizgenin habarlaǵan edik.
